بارەگای فیرقەیەکی تری هێزەکانی پێشمەرگە دیاری کرا

بەمەبەستی خێراتر کردنی هەنگاوەکانی دروست کردنی فیرقەکان و رایی کردنی کاروبارەکانیان، ئەمڕۆ ١٣ی کانوونی دووەمی ٢٠٢٢، فەریق روکن عیسا عوزێر سەرۆکی ئەرکانی وەزارەت، نەجات علی فەرماندەی هێزەکانی ٨٠ و کۆڵۆنێڵ سۆریا بەرپرسی تیمی راوێژکارانی هێزەکانی هاوپەیمانان لە هەرێمی کوردستان، سەردانی میحوەری ٦ی هێزەکانی پێشمەرگەیان کرد، لەوێ لەلایەن سیروان بارزانی فەرماندەی میحوەرەوە پێشوازییان لێکرا.
لە دیدارێکدا، باس لە دوا پێشهاتەکانی دروست کردنی فیرقەکانی سەر بە وەزارەتی پێشمەرگە کرا، پاشان بەیەکەوە سەردانی دوو ناوچەی جیاوازیان کرد، کە دەستنیشان کراون ببن بە شوێنی کاتی و بەردەوامی ئەو فیرقەیەی، کە دەکەوێتە سنوری میحوەری ٦ی هێزەکانی پێشمەرگە.
لەم سەردانەدا، هەموو لایەک کۆک بوون لەسەر دەستنیشان کردنی ئەو دوو ناوچەیە و بە گونجاویان زانی بۆ بارەگای فیرقە، وابڕیارە لە ئاییندەیەکی نزیکدا، کار لەسەر تەواو کردنی شوێنی بارەگاکانی هەردوو فیرقەکانی وەزارەتی پێشمەرگە بکرێت.