بەرپرسی بەشی شەهیدان لە مەكتەبی رێكخستنی کەرکووک-گەرمیان گوتی، هەموو ڕێکارەکانی پێدانی یەکەی نیشتەجێبوون و زەوی بە کەسوکاری شەهیدان تەواو بوون و ناوەکانیش بە لیست پێشکەشی وەزارەتی شەهیدان و ئەنفالکراوانی حکوومەتی هەرێمی کوردستان کراون، بۆ ئەوەی کەسوکاری شەهیدان یەکەی نیشتەجێبوونیان بۆ دروست بکرێت و چاوەڕێی حکوومەت دەکەن هەنگاوی کرداری بنێت.
عەبدولڕەحمان دەلۆ، بەرپرسی بەشی شەهیدان لە مەكتەبی رێكخستنی کەرکووک-گەرمیان، بۆ ماڵپەڕی فەرمیی پارتی دیموکراتی کوردستان گوتی: لە سنووری ئێمە داواکاریی کەسوکاری سەربەرزی شەهیدانمان پێشکەشی سەرۆک بارزانی و سەرۆکی هەرێم و سەرۆکی حکوومەت کردووە و لەگەڵ وەزارەتی شەهیدانیش قسەمان کردووە و سەردانیشمان کردوون، لیستی ناوی شەهیدانی خۆمان پێشکەشی ئەوان کرد، ئەوەی پێویست بێت لەسەر ئێمە کردوومانە، بۆیە هەموو ڕێکارێکمان گرتووەتە بەر و ئەوانیش لە وەزارەت لیژنەیەکیان پێک هێنا و ئێمەش نوێنەری خۆمان دیاری کرد و داوای لیست و پێداویستییان کرد و ئێمەش هەموومان پێشکەش کردوون و ڕێکارەکان هەمووی تەواو بوون و چاوەڕێی هەنگاوی کردارین.
عەبدولڕەحمان دەلۆ گوتیشی: لە سنووری ئێمە لە کەرکووک زیاتر لە هەزار شەهیدمان هەیە کە چەندین جۆرە هی شۆڕشی ئەیلوول و گوڵان و شەڕی داعش و شەڕی تیرۆر، تەنها پێنج خانەوادەی شەهیدان لە وەرگرتنی یەکەی نیشتەجێبوون سوودمەند بوون، ئەوانیش لە گەڕەکی سەروەران لە هەولێر ئەوانەی دیکە ماون و لە سنووری چەمچەماڵیش 350 خانوو لەلایەن مەکتەبی سەرۆک بارزانی و مەکتەبی سیاسی لە کۆمپانیایەک کڕیمان و بەسەر کەسوکاری شەهیداندا دابەش کرا و لە دەربەندیخانیش 70 خانوو، بۆیە ئەوانە سوودمەند بوونە و لە سنووری گەرمیانیش 400 پارچە زەوی بۆ کەسوکاری شەهیدانمان دابین کراوە.
دەلۆ باسی لەوەش کرد: لە سنووری کەرکووک و خانەقین و دووزخورماتوو کەسوکاری شەهیدانی ئێمە سوودمەند نەبوون، بۆیە چاوەڕێی حکوومەت دەکەین کە هەنگاوی کرداری بنێت بۆ ئەوەی یەکەی نیشتەجێبوون بۆ کەسوکاری شەهیدان دروست بکرێت و ئەوانیش سوودمەند بن .
وەڵام بدەوه