ئەمڕۆ دووشەممە، لە شاری بەغدا، شاندی حکوومەتی هەرێمی کوردستان، سەردانی بانکی ناوەندیی فیدراڵیان کرد و لەلایەن مستەفا غالب پارێزگاری بانکی ناوەندیی عێراق پێشوازییان لێ کرا.
شاندی حکوومەتی هەرێمی کوردستان پێکهاتبوون لە کەمال محەمەد ساڵح، وەزیری سامانە سروشتییەکان بەوەکالەت، د.ئومێد سەباح، سەرۆکی دیوانی ئەنجومەنی وەزیران، د.عەبدولحەکیم خەسرەو، سەرۆکی فەرمانگەی هەماهەنگی و بەدواداچوون، د.جوتیار عادل، گوتەبێژی حکومەتی هەرێمی کوردستان و سەرۆکی فەرمانگەی میدیا و زانیاری و فارس عیسا، سەرۆکی نوێنەرایەتی حکومەتی هەرێم لە بەغدا.
لە دیدارێکدا کە ئیحسان ئەلیاسری، ڕاوێژکاری بانکی ناوەندی ئامادەی بوو، هەردوولا جەختیان لەسەر هەماهەنگی نێوانیان کردەوە لەبارەی رێکخستنەوەی کەرتی بانکی و بەردەوامیدان بە تەواوکردنی ڕێکارەکانی دروستکردنی بانکی نیشتمان لە هەرێمی کوردستان بۆ ئەوەی هاونیشتمانییان بتوانن سوودی لێ وەربگرن.
ماوەی دوو ڕۆژە شاندی حکوومەتی هەرێمی کوردستان بۆ گفتوگۆ کردن لەسەر چەند پرسێکی گرنگی تایبەت بە شایستەکانی هەرێمی کوردستان و چارەسەرکردنی کێشە هەڵپەسێردراوەکانی نێوان حکومەتی هەرێمی کوردستان و حکومەتی فیدراڵی، سەردانی بەغدایان کردووە و چەندین کۆبوونەوەیان ئەنجام داوە.
وەڵام بدەوه