ڕێکەوتن لەنێوان ھەولێر و بەغدا دەکرێت.

وەزیری دارایی و ئابووری حكوومەتی هەرێمی كوردستان رایگەیاند: "لە بەروارێکی نزیکدا بڕیارە سەردانی بەغدا بکەین بۆ یەکلایی کردنەوەی بابەتەکان و گەشبینین بەوەی ڕێکەوتن بکرێت لە نێوان هەولێر و بەغدا لەسەر کۆتاییهێنان بە کێشەکان."

بەپێی راگەیاندراوێكی وەزارەتی دارایی حكوومەتی هەرێمی كوردستان، ئەمڕۆ سێشەممە2022/11/22، ئاوات جەناب نوری، وەزیری دارایی و ئابووری پێشوازی لە شاندی کونسلی گشتی فەرەنسا لە هەولێر کرد، کە پێکهاتبوون لە رودولف ریشاڵد، جێگری کونسڵی گشتی فەرەنسا لە هەولێر وهۆگو بۆغێل، ڕاوێژكاری دارایی بۆ ڕۆژهەڵاتی ناوەڕاست و كامی شابی، پاشکۆی ئابووری باڵوێزخانەی فەرەنسا لە بەغدا.

ئاماژە بەوە كراوە، ئامانجی سەردانەکەیان بەمەبەستی ئاگاداربوون لە دەستپێکردن بە دانووستاندنەکانی نێوان حکوومەتی هەرێمی کوردستان و حکوومەتی ناوەند بوو، سەبارەت بە گفتوگۆکردن لەبارەی پڕۆژە یاسای بودجەی 2023 و چارەسەرکردنی دۆسیەی نەوت و غاز.

لە راگەیاندراوەكە ئەوە خراوەتە ڕوو، لە دیدارێکدا، ئاوات جەناب نوری، وەزیری دارایی و ئابووری وێرای بەخێرهاتنی شاندی میوان "سوپاسی حکوومەتی فەرەنسای کرد کە هەمیشە پاڵپشتی پرسەکانی گەلی کورد بووە بەدرێژایی مێژوو."

لەمیانی کۆبوونەوەکەدا، وەزیری دارایی و ئابووری گوتی: "لە بەروارێکی نزیکدا بڕیارە سەردانی بەغدا بکەین بۆ یەکلایی کردنەوەی بابەتەکان و گەشبینین بەوەی ڕێکەوتن بکرێت لە نێوان هەولێر و بەغدا لەسەر کۆتایی هێنان بە کێشەکان."

وەزارەتی دارایی ئاشكراشی كردووە،لای خۆیانەوە، شاندی میوان بە وەزیری دارایی و ئابووریان ڕاگەیاند: "ئامادەین هەماهەنگی دانوستاندنەکان بکەین بەمەبەستی چارەسەرکردنی کێشە داراییەکانی بەشە بودجەی هەرێمی کوردستان."

لە کۆتایی کۆبوونەوەکەدا، هەردوو لا خۆشحال بوون بە هاوبەشی کاربکەن بۆ چارەسەر کردنی کێشە داراییەکانی نێوان هەرێمی کوردستان و حکوومەتی ناوەند.