سەرۆكی حكوومەتی هەرێمی كوردستان، ڕەزامەندی لەسەر پێشنیازی وەزارەتی شارەوانی دەربڕی

مەسروور بارزانی سەرۆكی حكوومەتی هەرێمی كوردستان، ڕەزامەندی لەسەر پێشنیازی وەزارەتی شارەوانی و گەشتوگوزار دەربڕی بە قەرەبووكردنەوەی سوودمەندانی گوندی كۆری بە تاپۆكردنی زەوییەكانیان.
لە پێشنیازەكەی وەزارەتی شارەوانی و گەشتوگوزاردا هاتووە، پێویستە سوودمەندان لە هەمان شوێنی خۆیان كە پێشتر بۆیان دیاری كرابوو، قەرەبوو بكرێنەوە، هەروەها لە هەموو باج و ڕسووماتێك ببەخشرێن كە لە نەخشەی گەزنە پارچە زەوییەكەیان بەناو كراوە، بەرانبەر دەستبەرداربوونیان لەو پارچە زەوییانە و بەناوكردنی پارچە زەوی تر لەو بەشەی پرۆژەی گوندی كۆری، لەبەر ئەوەی بابەتەكە لە بەرژەوەندیی گشتی و كەسانی كەمدەرامەتە.
پاش ئەوەی بە نووسراوی ژمارە (566)ی ڕێكەوتی 31/8/2022 ڕەزامەندیی سەرۆكی ئەنجوومەنی وەزیران لەسەر قەرەبووكردنەوەی زەوییەكانی گوندی كۆری درا، چەند پێشنیازێك بۆ شێوازی ئەو قەرەبووكردنەوانە خرانە ڕوو، بەڵام وەزارەتی شارەوانی وگەشتوگوزار لەپێناو بەرژەوەندیی سوودمەندان كە خەڵكی كەمدەرامەت و شایستەن، جەختی لەسەر باشترین پێشنیاز كردەوە كە شایستەی ئەو هاووڵاتییانە بێت و بە نووسراوی ژمارە (449) لە ڕێكەوتی 11/10/2022 بۆ سەرۆكایەتیی دیوانی لە ئەنجوومەنی وەزیران بەرز كردەوە كە لە هەمان سنووری گوندی كۆری قەرەبوو بكرێنەوە و ڕێكەوتی 7/11/2022 بە نووسراوێك ئاماژە بەوە كرا كە ڕێزدار مەسروور بارزانی سەرۆكی ئەنجوومەنی وەزیران ڕەزامەندی لەسەر پێشنیازەكان دەربڕیوە.