کێ لە پشت پاشاگەردانی گەرمیانە

کێ لە پشت پاشاگەردانی گەرمیانە ڕاستیەکی حاشاهەڵنەگرو حەقیقەتێکی رۆشنە هەر شوێنێک دەستی ئاوەدانی و خزمەتگوزاری حکومەتی گەیشتبێ، ئاوەدانی و سیمای جوانی شارستانی رووی لەو دەڤەرە کردووەو لە هەر شوێنێکیش حکومەت ئاستەنگ و کۆسپی خرابێتە بەردەم، پاشاگەردانی و کەموکورتی رووی لەو شوێن و دەڤەر کردووە. بەداخەوە گەرمیان بە گشتی و پارێزگای سلێمانی بە تایبەتی لە ساڵانی رابردوودا بە هۆی ئەو فەزا فرەجەمسەری و فرەکوێخاییەی باڵی بەسەر ژینگەی سیاسی و رۆحی کارکردن و چالاکیە حکومیەکاندا کێشاوە، نەیتوانی سوود لە پرۆژە خزنەتگوزاریە فرەرەهەندەکانی حکومەتی هەرێم وەربگرێ و رووەو ئاوەدانی زیاترو گەشەی ئابوریەوە هەنگاو بنێت. سەرباری سینگ فراوانی و هەوڵە بەردەوام و چڕوپڕەکانی حکومەتی هەرێم بۆ درێژکردنی دەستی هاوکاری و یارمەتیدانی کاربەدەستە لۆکالیەکانی حکومەتی خۆجێی گەرمیان، لێ مخابن بەهۆی گەورەکردنی ئاستەنگ و کێشە نانەوەو بە سیاسی کردنی قەیران و تەنگژەکانەوە، حکومەتی هەرێم پڕوباڵی کرا و پانتای کارو چالاکیە خزنەتگوزاریەکانی لێ بەرتەسک کرایەوە. زیاد لەمەش چەند بکەرێکی سیاسی لەم شارە ساڵانێک بە بەردەوامیدان بە پروپاگندەی ژەهراوی و تیرۆری فکری و چەواشەکاری و بە لارێدابردنی رای گشتی گەرمیان و ختۆکەدانی دانیشتوانیەوە دژبە حکومەتی هەرێم, فەزایەکی دژەحکومتیان رەخساند و بە جدی کاریان لەسەر ناشرین کردن و بە دێوەزمە نیشان دانی حکومەتی هەرێم و کارو جموجۆڵەکانیەوە کرد. تا کار گەیشتە گڵدانەوەی داهات و پەرەسەندنی قاچاقچێتی سەر سنوورەکان بە بێ گەڕانەوە بۆ دامودەزگاکانی دەوڵەتەوە. جیاوازیە بونیادیەکانی سیماو روخساری ئاوەدانی لە نێوان سلێمانی و هەولێرو دهۆک بۆ دوو جۆر لە کولتورو تێگەیشتن لە چەمکی حوکمرانی رەشید و دوو جۆر دونیابینی و روانگەی حوکمرانی و رویای کارکردن دەگەرێتەوە، نەک گرینگی نەدان بە گەرمیان و سلێمانی لە لایەن حکومەتی هەرێمەوە. بەرپرس و کۆمەڵێک لە کاراکتەرە پۆپۆلیستەکان گەرمیان مخابن هەمیشە حکومەتی هەرێمیان بە نەیار وێناکردووەو وێنەیەکی درۆیینیان لە حکومەت لە سەر رووبەری فەزای گشتیدا بەرهەڤ کردووەو لە هیچ کردارێک و لێدوانێکی ژەهراوی دژە حکومەت و چەواشەکارانە لایان نەداوە.