کوردستان پرێس / سلێمانی
ئەمڕۆ پێنجشەممە، حەوتەمین دانیشتنی دادگاییکردنی لاهور شێخ جەنگی و ۱۲ دەستگیرکراوی دیکەی ڕووداوەکانی لالەزار لە دادگای تاوانەکانی سلێمانی بەڕێوەچوو. بەپێی زانیارییەکان، لە دانیشتنەکەدا سەرجەم دەستگیرکراوان تۆمەتەکانی ئاڕاستەیان کرابوو ڕەتکردەوە، هەروەها لاهور شێخ جەنگی ڕاستەوخۆ بە دادوەری ڕاگەیاندووە کە داوا دەکات بەزوویی دۆسیەکە یەکلایی بکرێتەوە و دەستگیرکراوان لەوە زیاتر لە زیندان نەهێڵرێنەوە.
لە کۆنگرەیەکی ڕۆژنامەوانیدا، دانا تەقیەددین، وتەبێژی تیمی پارێزەرانی لاهور شێخ جەنگی ڕایگەیاند: "ئەمڕۆ دادگا تۆمەتی ئاڕاستەی دەستگیرکراوان کرد و هەر ۱۲ دەستگیرکراوەکە تۆمەتەکانیان ڕەتکردەوە. بەهۆی ئامادەنەنەبوونی لائحیەی داواکاری گشتی، دانیشتنەکە بۆ هەفتەی داهاتوو دواخرا. ئێمەش وەک تیمی پارێزەران لائحەمان پێشکەش نەکردووە و بڕیارە هەفتەی ئایندە دانیشتنێکی دیکە بەڕێوەبچێت."
وتەبێژی تیمی پارێزەران ئاماژەی بەوەش کرد، ئەو تێبینی و داواکارییانەی پێشکەشی دادگای تاوانی/۲ کرابوون لەلایەن دادگاوە خوێنرانەوە، و وتیشی: "ئێمە لە سەرەتای دادگاییکردنەکەوە دەیانزانی کە تۆمەتباریان دەکەن، ماوەتەوە سەر لائحە و تۆمەتەکان. پێنجشەممەی داهاتووش دوای ئاڕاستەکردنی تۆمەتەکان، سزاکان یان بڕیارەکان ڕوون دەبنەوە."
پەیوەست بە دۆسیەکانی دیکە، دانا تەقیەددین ڕوونی کردەوە کە دۆسیەی تایبەت بە ماددەی ٤۰٦ (کە ۲۲ کەس تێیدا دەستگیرکراون) بۆ ڕۆژی ۲۸ی ۱۰ی ئەمساڵ دواخراوە، لە کاتێکدا دانیشتنەکەی ئەمڕۆ بەپێی ماددەی ٥٦ لە یاسای سزادانی عێراقی بەڕێوەچووە. تەئکیدیشی کردەوە کە هەر بڕیارێک لەلایەن دادگای تاوانەکانی سلێمانییەوە دەربچێت، لەلایەن تیمی پارێزەرانەوە تەمیز دەکرێتەوە و داوای پێداچوونەوەی بۆ دەکرێت.
وەڵام بدەوه