سەرۆکی حکوومەت پێشانگەکە دەكاتەوە

سەرۆكی حكوومەتی هەرێمی كوردستان حەوتەمین پێشانگەی نێودەوڵەتی خانووبەرە دەكاتەوە، لەو پێشانگەیە 250 كۆمپانیا بەشداریی تێدا دەكەن.

ئەمڕۆ چوارشەم نۆی ئەیلوول، مەسروور بارزانی سەرۆكی حكوومەتی هەرێمی كوردستان، حەوتەمین پێشانگەی نێودەوڵەتیی بۆ وەبەرهێنانی خانووبەرە لە هەولێر دەكاتەوە.

لەو پێشانگەیە زیاتر لە 250 كۆمپانیا لە 16 وڵاتی دنیا بەشداریی تێدا دەكەن، لە ناویاندا توركیا، ئێران، ئیمارات، سعوودیە، ئەڵمانیا، چین، ئیتاڵیا، یۆنان، ئیسپانیا و چەندان وڵاتی تر هەن، پێشانگەكەش بۆ ماوەی سێ ڕۆژ بەردەوام دەبێت.

ئامانجی پێشانگەكە نمایشكردنی پڕۆژەكانی نیشتەجێبوونە، هاووڵاتییان دەتوانن ڕاستەوخۆ لەگەڵ كۆمپانیاكان كۆببنەوە و یەكەی نیشتەجێبوون بە شێوازی قۆناخدار یان بە پارەی كاش هەڵبژێرن، هەروەها ئەم پێشانگەیە ژینگەیەك بۆ بازرگانان و وەبەرهێنەران دەڕەخسێنێت تا گرێبەستی هاوبەش ببەستن و سەرمایەی بیانی ڕابكێشن.