راگەیاندراوێک لە حکومەتی هەرێمەوە

ئەمڕۆ سێشەم هەشتی ئەیلوولی 2026، فەرمانگەی پێوەندییەکانی دەرەوەی حكوومەتی هەرێمی کوردستان، بەتوندی سەرکۆنەی ئەو هێرشانەی کرد کە کراونەتە سەر شار و دامەزراوە ئابوورییەکانی سعوودیە، هاوکات پشتیوانی و هاوسۆزیی تەواوی خۆی بۆ ئەو وڵاتە دووپات کردەوە.
لە ڕاگەیەنراوێکدا هاتووە کە فەرمانگەی پێوەندییەکانی دەرەوە سەرکۆنەی ئەو هێرشانە دەکات کە بوونەتە هۆی برینداربوونی خەڵکی مەدەنی، بەتایبەتی ژنان و منداڵان. حكوومەتی هەرێمی کوردستان هاوسۆزیی تەواوی خۆی بۆ سعوودیە و گەلەکەی ڕادەگەیەنێت و بەتوندی ڕەتی دەکاتەوە کە خەڵکی سڤیل و دامەزراوە مەدەنییەکان بکرێنە ئامانج، یان هەر کارێک بکرێت کە ژیانی بێتاوانان بخاتە مەترسییەوە، چونکە ئەو کارانە بەتەواوی پێچەوانەی بەها مرۆییەکانن.
لە بەشێکی تری ڕاگەیەنراوەکەدا، حكوومەتی هەرێمی کوردستان دووپاتی دەکاتەوە کە ئاشتی و گفتوگۆ باشترین ڕێگەن بۆ چارەسەرکردنی تەنگژە و ململانێکان. هەروەها هۆشداری دەدات کە بەردەوامبوونی گرژی و توندوتیژییەکان، تەنیا دەبێتە هۆی قووڵبوونەوەی زیاتری ناسەقامگیری لە ناوچەکەدا، کە ئەوەش کاریگەریی نەرێنیی لەسەر گەلان و ئاسایشیان دەبێت.