لیژنەی دارایی لە ئەنجومەنی نوێنەرانی عێراق ڕایگەیاند، وەزارەتی دارایی ڕەزامەندی نیشانداوە بۆ جێگیرکردنی دۆسیەی بەهەمیشەییکردنی فەرمانبەرانی گرێبەست لە پڕۆژەیاسای بودجەی گشتیی ساڵی ٢٠٢٧دا و دابینکردنی شایستە داراییەکانیان.
پوختەی هەواڵ
وەزیری دارایی عێراق بە فەرمی ڕەزامەندی دەربڕیوە لەسەر بەهەمیشەییکردنی کارمەندانی گرێبەست لە دامەزراوەکانی دەوڵەتدا. بڕیارەکە لە چوارچێوەی پڕۆژەیاسای بودجەی ٢٠٢٧دا جێبەجێ دەکرێت و سەرجەم شایستە دارایی و ئیدارییەکانیان بۆ زامن دەکرێت.
وردەکاریی هەواڵەکە
محەمەد حسێن ئەبولعیس، ئەندامی لیژنەی دارایی لە ئەنجومەنی نوێنەران، لە لێدوانێکدا بۆ ڕۆژنامەی فەرمیی عێراق ئاشکرای کرد کە دۆسیەی دامەزراندنی کارمەندانی گرێبەست بە تەواوی لای وەزارەتی داراییە. ئاماژەی بەوەش کرد کە فالح ساری، وەزیری دارایی، ڕەزامەندی لەسەر جێگیرکردنی گرێبەستەکان لە بودجەی ٢٠٢٧دا داوە، لەگەڵ چارەسەرکردنی سەرجەم دۆسیە وەزیفییە پەیوەندیدارەکانیان بە راژەوە.
ناوبراو ڕوونیشی کردەوە کە وەزیری دارایی لە کۆبوونەوەکانی پەرلەماندا بەردەوامیی چارەسەرکردنی ئەم دۆسیەیەی لە چوارچێوەی پڕۆژەی بودجەدا پشتڕاستکردۆتەوە. پێشبینیش دەکرێت لە مانگی داهاتوودا پڕۆژەیاسای بودجە بگاتە لیژنەی دارایی، تاوەکو دوای تەواوکردنی ڕێکارەکان، گفتوگۆ لەسەر بڕگە و تەرخانکراوە داراییەکانی لەناو ئەنجومەنی نوێنەراندا دەستپێبکات.
مسۆگەركردنی سەقامگیریی وەزیفی
لە لایەکی ترەوە، عەلی شەداد، ئەندامی لیژنەی دارایی جەختی کردەوە کە دامەزراندنی گرێبەستەکان دەخرێتە ناو دەقی یاسایی بودجەی ٢٠٢٧. ئامانج لەم هەنگاوە باشکردنی گوزەرانی ئەم توێژە لەسەر راژەی هەمیشەیی، زامنی سەقامگیریی وەزیفی و پاراستنی مافی ئەو کارمەندانەیە کە ساڵانێکە لە دامەزراوەکانی دەوڵەتدا بە شێوەی گرێبەست خزمەت دەکەن.
#Kurdistanpress
وەڵام بدەوه