پەیامێک لە سەرۆکی حکومەت بەڕێز مەسرور بارزانی

مەسروور بارزانی سەرۆكی حكوومەتی هەرێمی كوردستان، لەبارەی چەند بابەتێك لێدوانی داو رای گەیاند، تا ئێستە هیچ رێككەوتنێك لەبارەی پۆستی سەرۆك كۆمار نەكراوە.

ئەمڕۆ یەكشەم یەكی شوباتی،  بە ئامادەبوونی مەسروور بارزانی سەرۆكی حكوومەتی هەرێمی كوردستان، رێوڕەسمی ساڵیادی 'شەهیدانی یەكی شوبات' لە هەولێر بەڕێوەچوو. 

لە رێوڕەسمەكەدا، سەرۆكی حكوومەتی هەرێمی كوردستان، تاجەگوڵینەی رێز و وەفای لەسەر مۆنۆمێنتی شەهیدانی یەكی شوبات دانا.

مەسروور بارزانی سەرۆكی حكوموەتی هەرێمی كوردستان، لە لێدوانێكی رۆژنامەوانیدا رای گەیاند، سەرۆك بارزانی رۆڵی سەرەكیی بینی لە رێككەوتنەكەی هەسەدە و حكوومەتی سووریا و هیوای خواست، ئاشتی و سەقامگیری بگەڕێتەوە سووریا و رۆژئاوای كوردستان. 

لەبارەی پۆستی سەرۆك كۆماریش، سەرۆك وەزیران باسی لەوە كرد، هیچ رێككەوتنێك نەكراوە، گفتوگۆكان بەردەوامن و بزانین بە چی دەگەین.

 گوتی، بەپێی بەرژەوەندیی باڵاكانی گەلەكەمان بڕیار دەدەین.