مژدەی خۆش بۆ شوفێران هات

وەزارەتی ناوخۆ بڕیاری لێخۆشبوون لە سزای دواکەوتنی گرێبەستی ئەلیکترۆنیی ئۆتۆمبێلی بۆ شۆفێران دەرکرد و ڕاشیگەیاند، تاوەكوو 1ـی شووبات سەردانی لایەنە پەیوەندیدارەكان بكەن. 
ئەمڕۆ یەكشەممە 11ـی 1ـی 2026، فەرمانگەی میدیا و زانیاریی حكوومەتی هەرێمی كوردستان، بڵاوی کردەوە، كە "وەزارەتی ناوخۆی حکوومەتی هەرێمی کوردستان، بڕیارێکی نوێی بۆ کارئاسانیی هاووڵاتییان دەرکرد، بەپێی بڕیارەکە لێخۆشبوون بۆ سزای دواکەوتنی ئەو گرێبەستە ئەلیکترۆنییانە دەردەچێت، کە لە ماوەی یاسایی 60 ڕۆژدا مامەڵەی گواستنەوەی خاوەندارییەتییان بۆ نەکراوە."
ئاماژەی بەوەش داوە، ئەم بڕیارە هەموو ئەو کەسانە دەگرێتەوە، کە بە هەر هۆکارێک بێت نەیانتوانیوە لە کاتی دیاریکراودا ئۆتۆمبێلەکانیان تۆمار بکەن، بەو مەرجەی تاوەکوو ڕێککەوتی 1ی شووباتی 2026، سەردانی لایەنە پەیوەندیدارەکان بکەن.
فەرمانگەی میدیا و زانیاری، جەختی لەوە کردووەتەوە: "ئەم هەنگاوەی وەزارەتی ناوخۆ لە چوارچێوەی هەوڵەکانی حکوومەتی هەرێمی کوردستاندایە بۆ کەمکردنەوەی بارگرانیی دارایی لەسەر شانی هاووڵاتییان و ڕێکخستنەوەی مامەڵەکانی هاتوچۆ بە شێوازێکی سەردەمیانە و ئەلیکترۆنی."