بەمەرج هێزەکانمان لە حەلەبەوە بۆ  ڕۆژهەڵاتی فورات دەگوازینەوە

لە بەیاننامەیەکی فەرمی ئیدارەی خۆسەری باکوور و ڕۆژهەڵاتی سووریا، هەڵوێستی خۆی سەبارەت بە ئایندەی گەڕەکەکانی شێخ مەقسوود و ئەشرەفیە لە شاری حەلەب ڕاگەیاند و ئامادەیی خۆی نیشان دا بۆ دووبارە جێگیرکردنەوەی هێزەکانی لە ژێر چاودێری نێودەوڵەتیدا.
ئیدارەی خۆسەر جەختی لەوەشکردووەتەوە، پاراستنی گیانی هاووڵاتیانی مەدەنی لە گەڕەکەکانی شێخ مەقسوود و ئەشرەفیە لە سەرووی هەموو ئەولەویەتەکانیاندایە. لەم سۆنگەیەشەوە، پێشوازی لە پێشنیازی لایەنە نێوەندگیرە نێودەوڵەتییەکان دەکەن بۆ گواستنەوەی ئەو هێزانەی ئێستا لە شێخ مەقسوود جێگیرن بەرەو ناوچەکانی ڕۆژهەڵاتی ڕووباری فورات بە شێوەیەکی سەلامەت.
بەگوێرەی بەیاننامەکە، ئیدارەی خۆسەر جێبەجێکردنی ئەم هەنگاوەی بەستووەتەوە بە چەند مەرجێکی سەرەکییەوە کە گەرەنتی مافی دانیشتووانی ناوچەکە بکات، ئەوانیش: دابینکردنی گەرەنتی بۆ مانەوە و بەردەوامیی هێزە ئەمنییە ناوخۆییە کوردییەکان (ئاساییش) لەناو گەڕەکەکەدا. لەگەڵ هێشتنەوە و کاراکردنی ئەنجوومەنێکی ناوخۆیی بۆ بەڕێوەبردنی کاروباری دانیشتووانی ئەو دوو گەڕەکە.
ئیدارەی خۆسەر ئاماژەی بەوەش کردووە؛ ئەم مەرجانە لەسەر بنەمای ڕێککەوتنی 1ـی نیسان داڕێژراون، مەبەست لێیان پاراستنی سەقامگیری و ڕێگریکردنە لە هەر پێشێلکارییەک بەرامبەر دانیشتووانی ڕەسەنی ناوچەکە