واده‌ی ڕاگه‌یاندنی ئه‌نجامی هەڵبژاردن ڕاگەیەندرا

كۆمسیۆنی باڵای سه‌ربه‌خۆی هه‌ڵبژاردنه‌كانی عێراق رایگه‌یاند، لیژنه‌یه‌كی یاسایی به‌ سه‌رۆكایه‌تی دادوه‌ر و ڕاوێژكاران بۆ یه‌كلاییكردنه‌وه‌ی تانه‌ و سكاڵاكان پێكهێنراوه‌ و ده‌شڵێت، له‌هه‌فته‌ی داهاتودا ئه‌نجامی فه‌رمی هه‌ڵبژاردنی ئه‌نجومه‌نی نوێنه‌رانی راده‌گه‌یه‌ندرێت.

به‌وته‌ی، كۆمسیۆنی باڵای سه‌ربه‌خۆی هه‌ڵبژاردنه‌كان، لیژنه‌یه‌كیان پێكهێناوه‌ له‌ كه‌سانی یاسایی تایبه‌تمه‌ند، به‌ سه‌رۆكایه‌تی ئه‌ندامانی ده‌سته‌ی كۆمسیاران و له‌وانه‌ش دادوه‌ر و ڕاوێژكاران، بۆ یه‌كلاكردنه‌وه‌ی تانه‌ و سكاڵاكان.

كۆمسیۆنی هه‌ڵبژاردنه‌كان باسی له‌وه‌شكردوه‌، هه‌مو بڕیارێكی ده‌سته‌ی كۆمیسیاران له‌ ماوه‌ی سێ ڕۆژدا له‌ دوای بڵاوبونه‌وه‌ی ئه‌نجامی هه‌ڵبژاردن، تانه‌ له‌ به‌رده‌م ده‌سه‌ڵاتی دادوه‌ریدا ده‌درێت.

له‌لای خۆشیه‌وه‌، جومانه‌ غه‌لای وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كان باسی له‌وه‌كردوه‌، ئه‌نجامی كۆتایی هه‌ڵبژاردن ده‌كه‌وێته‌ دوای یه‌كلاكردنه‌وه‌ی سكاڵاكان، ڕه‌نگه‌ ئه‌وه‌ش هه‌فته‌ی داهاتو بێت، هه‌روه‌ها ژماره‌ی كورسییه‌كان به‌پێی به‌رنامه‌یه‌كی تایبه‌ت هه‌ژمار ده‌كرێت.

جومانه‌ غه‌لای له‌ لێدوانه‌كه‌یدا رایگه‌یاندوه‌، 101 سكاڵا له‌سه‌ر ده‌نگدانی گشتی و تایبه‌ت تۆماركراون، له‌و ژماره‌یه‌ 44 سكاڵایان له‌ ده‌نگدانی تایبه‌ت تۆماركراون و 57 یان له‌ ده‌نگدانی گشتی تۆماركراون.


ڕۆژی سێشه‌ممه‌ی رابردو ده‌نگدانی گشتی له‌ عێراق و هه‌رێمی كوردستان بۆ هەڵبژاردنی پەرلەمانی كوردستان ئەنجامدرا، بە بەشداری 31 هاوپەیمانی، 38 حزب و 79 تاكەكەس كە تێدا زیاتر لە حەوت هەزار كاندید كێبڕكێی بەدەستهێنانی 329 كورسی پەرلەمانیان كرد و شەوی چوارشه‌ممه‌ش كۆمسیۆن ئەنجامە بەراییەكانی دەنگدانی بڵاویكردەوە.