سەرۆک وەزیران بەرزترین و ناوازەترین پردی كوردستانی لە سۆران کردەوە

سەرۆكی حكوومەتی هەرێمی كوردستان، بەرزترین و ناوازەترین پردی كوردستانی لە سۆران كردەوە و ڕایگەیاند: "ئەمە بەشێكە لە پڕۆژەكانمان."
ئەمڕۆ دووشەممە 27/10/2025، مەسرور بارزانی، سەرۆكی حكوومەتی هەرێمی كوردستان، بەرزترین و ناوازەترین پردی كوردستانی لە سۆران كردەوە و گوتی: "ئەمە بەشێكە لەو پرۆژانەی كە حكوومەتی هەرێمی كوردستان هەیەتی بۆ پەرەپێدانی ڕێگەوبان و باشتركردنی هاتوچۆ لە شارەكان، بۆ ئەوەی هەم گەشتیارەكان بتوانن زیاتر سەردانی ئەم دەڤەرە بكەن كە شوێنێكی زۆر زۆر سەرنجڕاكێشە، هەم خەڵكی ئێمەش بتوانێت باشتر سوود لەو رێگەوبانانە وەربگرێت."
دەقی قسەكانی مەسرور بارزانی، سەرۆكی حكوومەتی هەرێمی كوردستان:
بە ناوی خودای گەورە و میهرەبان
بەڕێزان
پێش هەموو شتێك، پیرۆزباییتان لێ دەكەم، ئەمە بەشێكە لەو پرۆژانەی كە حكوومەتی هەرێمی كوردستان هەیەتی بۆ پەرەپێدانی ڕێگەوبان و باشتركردنی هاتوچۆ لە شارەكان، بۆ ئەوەی هەم گەشتیارەكان بتوانن زیاتر سەردانی ئەم دەڤەرە بكەن كە شوێنێكی زۆر زۆر سەرنجڕاكێشە، هەم خەڵكی ئێمەش بتوانێت باشتر سوود لەو رێگەوبانانە وەربگرێت، هەم بۆ سەلامەتیی خۆشیان، بەم جۆرە و بەم ئاستە بەرزە كە دروست كراوە، بەڕاستی جێی شانازییە. من دەستخۆشی لە كۆمپانیای جێبەجێكار دەكەم و هیوادارم هەمیشە هەر سەركەوتوو بن.
داواشم لە هاووڵاتیانی خۆشەویست هەیە، ڕێنماییەكانی وەزارەتی ناوخۆ و هاتوچۆ لەبەرچاو بگرن، سەلامەتیی خۆیان و هاووڵاتیانیان لەبەرچاو بێت.
وەك هەمیشە داوایەكی تریشم هەیە، ژینگەی وڵاتەكەتان بپارێزن. جارێكی دیكە پیرۆزە لە هەموو لایەك