هەشت کۆمپانیای نێودەوڵەتیی نەوت، کە پێکەوە لەگەڵ پشکی حکوومەتی هەرێمی کوردستان، زیاتر لە 90%ی بەرهەمی نەوتی کوردستان پێک دەهێنن، ئەمڕۆ چوارشەممە ڕایانگەیاند، کە گەیشتوونەتە ڕێککەوتنی بنەڕەتی کاتی لەگەڵ بەغدا و هەولێر بۆ دەستپێکردنەوەی هەناردەکردنی نەوت لەڕێگەی بۆری نەوتی عێراق _ تورکیاوە.
کۆمپانیاکان سوپاسی مەسرور بارزانی، سەرۆكی حكوومەتی هەرێمی کوردستانیان کردووە بۆ "پشتگیرییە بەردەوامەکەی". هەروەها سوپاسی هاوبەشە نێودەوڵەتییەکانیان کرد بۆ یارمەتیدانیان لە پێشخستنی "چارەسەرێکی هاوبەشی دڵخواز کە سوودی بۆ عێراق، هەرێمی کوردستان و بازاڕەکانی وزەی جیهانی دەبێت".
چاوەڕوان دەکرێت ڕێککەوتنە کاتییەکان، کە بڕیارە لە چەند ڕۆژی داهاتوودا واژۆ و پەسەند بکرێت، ڕێگە بە دەستپێکردنەوەی هەناردەکردن بدات لەکاتێکی نزیکدا، لەهەمان کاتدا ڕێگا خۆش دەکات بۆ ڕێککەوتنێکی درێژخایەن.
لە بەیاننامەکەدا هاتووە، کە ئەم ڕێککەوتنە لەگەڵ یاسای بودجەی عێراق بۆ ساڵانی 2023 _2025، دەگونجێت و دواتر بەپێی پێداچوونەوەی ڕاوێژکارێکی سەربەخۆ نوێ دەکرێتەوە.
ئەم چوارچێوەیە گرێبەستە هەنووکەییەکان بە باوەڕپێکراوی دەهێڵێتەوە و گەرەنتی پارەدان بە کۆمپانیاکان دەدات. حکوومەتی هەرێمی کوردستان و کۆمپانیاکانیش ڕێککەوتن لەسەر ئەوەی کە لە ماوەی 30 ڕۆژدا لە دوای دەستپێکردنەوەی هەناردەکردن کۆ ببنەوە بۆ دانانی میکانیزمێک بۆ یەکلاکردنەوەی قەرزەکانی کۆمپانیاکان.
ڕوسیل فریمان، بەڕێوەبەری جێبەجێکاری HKN گوتی: "ئێمە دڵنیا و گەشبینین کە چارەسەرێکی بڕاوە بۆ هەردوولا دۆزراوەتەوە و دوای واژۆکردنی تەواوەتی لەلایەن هەموو لایەنە پەیوەندیدارەکانەوە، هەناردەکردنی نەوتی خاو لە هەرێمی کوردستانی عێراق بەم زووانە لەڕێگەی بۆری نەوتی عێراق _ تورکیا دەست پێدەکاتەوە."
وەڵام بدەوه