ڕۆژانی داهاتوو پارەی ئەو کەسانە دابەش دەکرێت

بڕێك پارەی گەنم بۆ جووتیاران خەرج كراوە، پشكی هەرێمی كوردستان 57 ملیار دینارە، بڕیارە كۆتایی هەفتە یان سەرەتای هەفتەی داهاتوو، پارەكە بگاتە دەستی جووتیاران، بۆ هەر شارێك بڕەكەی جیاوازە.

ئەمڕۆ دووشەم 22ـی ئەیلوول، نەوزاد شێخ كامیل بەڕێوەبەری گشتیی بازرگانیی هەرێمی كوردستان، رایگەیاند، كۆتایی ئەم هەفتەیە یان سەرەتای هەفتەی داهاتوو لە ڕێگەی سایلۆكانەوە، جووتیاران ئاگادار دەكرێنەوە و شایستە داراییەكانیان پێ دەدرێت.

زیاتر گوتی، رێكارە ئیدارییەكان تەواو دەكرێن و دەست بە دابەشكردنی پارەكە دەكرێت، چونكە ئێستە دەستیان بە ڕێكارە كارگێڕییەكان كردووە بۆ ئەوەی دابەشی سەر جووتیاران بكرێت.

باسی لەوەش كرد، بۆ ئەم قۆناغە پشكی هەرێمی كوردستان 57 ملیار دینارە، 20 ملیار بۆ هەولێر، 25 ملیار بۆ سلێمانی و هەڵەبجە و 12 ملیار دیناریش بۆ جووتیارانی دهۆك تەرخان كراوە.

ئەوە لە كاتێكدایە هەرێمی كوردستان، ئەمساڵ 400 هەزار تۆن گەنمی رادەستی عێراق كردووە، بڕی پارەكەی نزیكەی 310 ملیار دینارە، بەڵام تا ئیستە ناردنی تەواوی پارەكە دواكەوتووە.