پارێزگارى هەولێر، پێشوازیى لە بەرپرسى نووسینگەى عێراقى ڕێکخراوى UNDP کرد

ئەمڕۆ دووشەممە 2025.9.15، ئومێد خۆشناو، پارێزگارى هەولێر، لە دیوانى پارێزگا، پێشوازیى لە تیتۆن میترا، بەرپرسى نووسینگەى عێراقى ڕێکخراوى UNDP و کەنەدى، بەڕێوەبەرى نووسینگەى هەولێرى ڕێکخراوەکە کرد.

لە دیدارەکەدا، بەرپرسى نووسینگەى عێراقى ڕێکخراوى UNDP، سوپاسی پارێزگارى هەولێرى کرد بۆ پێشوازیەکەى و تسشکى خستەسەر ئەو پێشکەوتنانەى هەولێرى پایتەخت بە خۆیەوە بینیوە و خۆشحاڵى خۆى نیشاندا بەو پڕۆژە خزمەتگوزاریانەى لەشارەکە پێشکەش دەکرێن، هەروەها پاڵپشتى و هەماهەنگى و هاوکارى بەردەوامى بەرێز پارێزگارى هەولێرى بۆ ڕێکخراوەکەیان بەرز نرخاند و ستایشی ڕۆڵى بەڕێزیانی کرد لە سەرجەم ئەو کارانەى کە لە ماوەى ڕابردوودا بە هاوبەشى لەگەڵ نووسینگەى هەولێرى ڕێکخراوەکەیان ئەنجامدراون.

لە بەرامبەردا پارێزگارى هەولێر، هەوڵ و کارەکانى ڕێکخراوى ناوبراوى بەرز نرخاند و دەستخۆشى لە هامەهانگى و هاوبەشى نووسینگەى هەولێرى UNDP کرد لەگەڵ پارێزگاى هەولێر و هیواى سەرکەوتنى بۆ خواستن لەکارەکانیان و هەموو پاڵپشتى و هاوکارى و هەماهەنگییەکى پارێزگا و تیمى پارێزگاى هەولێرى نیشاندا بۆ سەرخستنى  پڕۆژەکانیان.

دواتر گفتوگۆ لە بارەى گۆڕانکارییەکانى کەش و هەوا کرا و تیشک خرایەسەر سەرجەم ئەو رێکار و کار و پڕۆژانەى کە لەو پێناوەدا لە سنوورى پارێزگاى هەولێر بە ئامانجى بەرگرتن لە مەترسیەکانى ئەنجامدراون، کە سەربارى قەیرانى دارایی و ئەو زوڵم و ستەمەى بەغدا بەرامبەر هەرێمى کوردستان دەیکات، بەڵام حکومەتى هەرێم بە سەرۆکایەتى ڕێزدار مەسرور بارزانى، سەرۆکوەزیران، توانیویەتى ژمارەیەکى زۆر پڕۆژەى ستراتیژى و گرنگ وەک پڕۆژەى فریاگوزارى خێراى گەیاندنى ئاوى هەولێر و پڕۆژەى ئاوى قوشتەپە و دروستکردنى ژمارەیەکى زۆرى بەنداو و پۆند بۆ پاراستنى سامانى ئاوى ژێرزەوى و پڕۆژەى ڕووناکى بۆ پاراستنى ژینگەى شارى هەولێر ئەنجامبدات.

لە تەوەرێکى ترى دیدارەکەدا، ئاماژەى بە پڕۆژەى پشتێنەی سەوزایی درا، کە گرنگیی زۆری بۆ شاری ھەولێر و پارساتنى ژینگە شارەکە هەیە، بۆ ئەو مەبەستەش هەردوولا بۆ بەدواداچوون و بەرچاووڕوونیان لە بارەى پڕۆژەکە خستە ڕوو، لەوبارەیەشەوە پارێزگارى هەولێر ئاشکراى کرد، پڕۆژەکە لە چەند زۆنێک پێکهاتووە و بەشێک لە زۆنەکانى کارکردن تێیدا دەستى پێکراوە، لەگەڵ نووسینگەى هەولێرى ڕێکخراوى UNDP یش چەند کۆبوونەوەیەکى پێویست ئەنجامدراون بۆ دیراسەکردن و داڕشتنى پلان و کارکردنى هاوبەش بۆ دەستکردن بە کارکردن لە زۆنێکى بەشێکى پڕۆژەکە، بۆ ئەومەبەستەش پارێزگارى هەولێر ئومێدى خواست بەرپرسى نووسینگەى عێراقى ڕێکخراوى UNDP هاوکار و هەماهەنگ بێت بۆ دەستپێکردنى پڕۆژەکە.

لە کۆتایدا، بەرپرسى نووسینگەى عێراقى ڕێکخراوى UNDP، سوپاسى پارێزگارى هەولێریان کرد بۆ پێشوازییەکەى و بەرچاوو ڕوونى لەکاروبارەکانى پارێزگاکە و ئەو خزمەتگوزارییانەى لەماوەى ڕابردوودا پێشکەش کراون و هەموو پاڵپشتى و هاریکاریەکى ڕێکخراوەکەشیان بۆ پارێزگاى هەولێر دووپاتکردەوە و جەختی لە کۆمەک و یارمەتییدانى بەردەوامى پرۆژەکانیان بە هاوبەشى لەگەڵ پارێزگا کردەوە.