کەشناسی : خۆڵبارین بەڕێوەیە

دەستەی کەشناسیی عێراق، ئەمڕۆ هەینی، وردەکاریی کەشوهەوای وڵاتی بۆ چوار ڕۆژی داهاتوو بڵاو کردەوە و ڕای گەیاند، لە هەندێک ناوچە خۆڵباران دەبێت و پلەکانی گەرمایش ناجێگیر دەبن.

سبەی شەموو، کەشوهەوا ساماڵ دەبێت و بایەکی مامناوەند لە ئاراستەی باکووری ڕۆژئاواوە هەڵدەکات. لە ناوچەکانی ناوەڕاست و باشوور چالاک دەبێت و دەبێتە هۆی بەرزبوونەوەی تۆزێکی سووک. پلەکانی گەرما لە ناوچەکانی ناوەڕاست و باکوور کەمێک بەرز دەبنەوە و لە باشوور نزیک دەبن لە تۆمارەکانی ئەمڕۆ.

بەرزترین پلەکانی گەرمای پێشبینیکراو بۆ سبەی شەموو:
دهۆک: 41
هەولێر، سلێمانی و ئەنبار: 43
بەغدا، نەینەوا، کەرکووک، واست، بابل و دیوانیە: 45
سەڵاحەدین، دیالە، کەربەلا، نەجەف و موسەننا: 46
زیقار: 47
بەسرە و میسان: 48

سەبارەت بە ڕۆژی یەکشەم، کەشوهەوا ساماڵ دەبێت لەگەڵ دەرکەوتنی هەندێک پەڵەهەوری جیاجیا و پلەکانی گەرما لە سەرانسەری وڵاتدا جێگیر دەبن، بەڵام هەڵکردنی با لە ناوەڕاست و باشوور بەردەوام دەبێت كە دەبێتە هۆی خۆڵباران.

ڕۆژی دووشەم کەشوهەوا ساماڵ دەبێت لەگەڵ دەرکەوتنی هەندێک هەور لە ناوچەکانی باکوور. پلەکانی گەرما لە ناوچەکانی ناوەڕاست و باکوور کەمێک دادەبەزن.

دەستەکە ئاماژەی بەوەش کردووە، ڕۆژی سێشەم پلەکانی گەرما لە ناوچەکانی ناوەڕاست و باشوور کەمێکی تر دادەبەزن و لە ناوچەکانی باکوور جێگیر دەبن.