هەواڵێکی خۆش بۆ هێزەکانی پێشمەرگە هات

بەرپرسی فۆرمەكانی دابەشكردنی زەوی لە وەزارەتی شارەوانی ئاشكرای دەكات، وەجبەیەكی دیكەی رەزامەندیی تەرخانكردن و پێدانی زەوی لە ئەنجوومەنی وەزیران، بۆ سێ هەزار پێشمەرگەی یەكەكانی 80 و 70 گەڕایەوە وەزارەتی شارەوانی.
سەربەست مەولوود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی و گەشتوگوزاری حكوومەتی هەرێمی كوردستان، ڕایگەیاند: "بەشێكی دیكەی رەزامەندیی تەرخانكردنی زەوی بۆ پێشمەرگەكانی هەردوو یەكەی 80 و یەكەی 70 لە ئەنجوومەنی وەزیران گەڕایەوە وەزارەتی شارەوانی."
ئاماژەی بەوەش دا: "ئەو لیستە نوێیانەی رەزامەنییان گەڕاوەتەوە، زیاتر لە دوو هەزار و 900 ناو ئەگرنەخۆ، یەكەی 80 دوو هەزار و 500 پێشمەرگەن و یەكەی 70 زیاتر لە 400 پێشمەرگەن".
لەكۆتایی مانگی رابردوو و سەرەتای ئەم مانگەدا، بە دەیان هەزار پێشمەرگە رەزامەندیی پێدانی زەوییان گەڕاوەتەوە، سەبارەت بەوەی بۆچی زیاتر ناوەكان هی وەزارەتی پێشمەرگەن، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی گوتی: "رەزامەندیی لیستی ناوی فەرمانبەرانی شارستانی و زۆربەی وەزارەت و دامودەزگاكان تەواو بووە، ژمارەیەکی کەم فۆڕممیان ماوە، بەڵام هی وەزارەتی پێشمەرگە و یەكەكانی 70 و 80 فۆڕمەكان زۆریان لای ئێمە بوون و بەشی زۆریان وردبینییان تەواو كراوە و ناوە ناوە رەزامەندیی پێدانی زەوییان دەگەڕێتەوە".
جەختی كردەوە، ئەو دوو هەزار و 900 ناوەی هاتوونەتەوە، دابەش دەبن بۆ چەند ناوچەیەكی جیاجیا، گوتیشی: "ئەو ناوانە كە بە لیست هاتوونەتەوە، دەستمان پێكردووە و نووسراویان بۆ دەكرێت، رەزامەندییەكان بەپێی شوێنی نیشتەجێبوون و كارتی زانیاری و بەپێی پارێزگا و ئیدارە سەربەخۆكان جیا دەكرێنەوە، پاشان بۆ شارەوانییە پەیوەندیدارەكانیان رەوانە دەكەین، بۆ تەرخانکردنی زەوی بۆیان."
زیاتر لە 490 هەزار ڕەزامەندیی تەرخانکردنی زەوی لە ئەنجوومەنی وەزیران بۆ فەرمانبەران و خانەنشینان و پێشمەرگە و كارمەندانی ناوخۆ دەرچووە.
لەسەرێكی دیكەوە، مەریوان حاکم هادی، بەڕێوەبەری گشتیی شارەوانییەکانی هەولێر  ڕایگەیاند: "كۆتایی ئەم هەفتەیە دەست بە دابەشكردنی زەویی فەرمانبەران دەكەینەوە و دوو هەزار پارچە زەوی لە سنووری شارەوانیی شەمامک بە تیروپشك بەسەر فەرمانبەران دابەش دەكرێت، ئەو پێشمەرگانەی پێشووتر رەزامەندییان گەڕاوەتەوە و كارتی زانیارییان شەمامكە، ئەوانیش لە پێدانی زەوی سوودمەند دەبن."
هەر فەرمانبەر و پێشمەرگەیەک، كە ‏هەشت ساڵ خزمەتی هەبێت و هەر خانەنشینێكیش لە كاتی فەرمانبەریدا سوودمەند نەبووبێت، زەوییەكی 200 مەتریی پێ دەدرێت.
ڕۆژی 27ی 03ی 2024، ئەنجوومەنی وەزیرانی هەرێمی کوردستان بڕیاری دا بە پێدانی زەوی بەو فەرمانبەرانەی کە سوودمەند نەبوونە.