دوو بەشەخۆراكی تازە دابەش دەكرێن و دڵنیاییەكیش بە هاووڵاتیان دەدرێ

بەڕێوەبەری گشتیی بازرگانی لە وەزارەتی بازرگانی و پیشەسازیی حكوومەتی هەرێمی كوردستان ئاشکرای دەکات، بەشەخۆراک و بەشەئاردی تازە دابەش دەکرێن و جەختیش دەكاتەوە، بەشەخۆراک بەتەواوی دابەش دەکرێت و مادەكان بەردەستن.
نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی ڕایگەیاند: "بەشەخۆراكی چوارەمی ئەمساڵ و بەشەئاردی شەشەمی هاووڵاتیان لە رێگەی بریكارەكانەوە دەدرێن، دوای ئەوە، گەنمی پێویستیش بۆ بەشی شەشەمی ئاردیش درایە ئاشەکان دەست بە دابەشکردنی ئاردیش کراوە."
ئەوەشی خستە ڕوو، مادە خۆراكییەكانی بەشی چوارەم هاوشێوەی مانگی سێیە و لەنێو شار و لە دەرەوەی شارەکانیش دەست بە دابەشکردن کراوە.
بەڕێوەبەری گشتیی بازرگانی لە وەزارەتی بازرگانی و پیشەسازی باسی لەوەش كرد، کێشەی زەیت چارەسەر کراوە.
بۆ بەشەخۆراك، برنج سێ كیلۆیە، شەكر كیلۆیەكە، زەیت لیترێكە، 400 گرام دۆشاوی تەماتە، لەگەڵ 250 گرام نۆك و 250 گرام لەتكەنۆك، لەگەڵ 500 گرام نیسک.
نەوزاد شێخ کامیل، دڵنیایی بە هاووڵاتیان دا و گوتی: "بەشەخۆراک بەتەواوی دابەش دەکرێت و مادەكان بەردەستن، هەروەها هەموو مادەكانیش پشكنینیان بۆ دەكرێت، دواتر دابەش دەكرێن، هەروەها ئاردیش تاقی دەكرێتەوە، ئەوكات دابەش دەكرێت."