هۆشداری دەدرێت پلەکانی گەرما دەفڕن

شارەزایەکی بواری کەشناسی رایگەیاند کە شەپۆلێکی گەرمای بەهێز بەڕێوەیە و لە هەندێک شوێن پلەی گەرما دەگاتە 50 پلەی سەدی

ئەمشەو یەکشەممە6/7/2025، ئاراس جەبار، شارەزای بواری کەشناسی بڵاوی کردەوە: "لەمڕۆوە کاریگەری ئەو بارستە هەوا فێنکەی لەسەر ناوچەکانمان بوو لاوازبووە و لە سبەینێوە تا کۆتایی ئەم هەفتەیە پلەی گەرمی 2 تا 3 پلە لە سەرجەم ناوچەکان بەرزدەبێتەوە و بای باکووری رۆژهەڵات لە ناوچەکانی پارێزگای سلێمانی و ئیدارەی راپەرین بۆ ئەمشەو، سبەینێ و دوو سبەی سێشەمە 8/7/2025 بە خێرایی 20 تا هەندێک جار بۆ زیاتر لە 60کم لە کاتژمێرێکدا چالاکی دەبێت و لە رۆژی چوارشەمەوە خێرایی با کەمدەبێتەوە و تا ناوەراستی هەفتەی داهاتوو بەردەوامی دەبێت."

ئاماژەی بەوەش داوە: "لە سەرەتای هەفتەی داهاتووشەوە رۆژی شەممە 12/7/2025 شەپۆلی بەرزبوونەوەی پلەکانی گەرما لە ناوچەکانمان دەستپێدەکات و پلەی گەرمی لە سەرجەم ناوچەکان بەرێژەیەکی بەرچاو بەرزدەبێتەوە و بەرزترین پلەی گەرمی لە سەنتەری پارێزگاکان چاوەڕوان دەکرێت بەم رێژەیە بەرزببێتەوە، هەولێر 46 بۆ 47 پلە، دهۆک، سلێمانی و هەڵەبجە 44 بۆ 45 پلە، کەرکووک و ناوچەکانی ئیدارەی گەرمیان 48 بۆ 50 پلە."