هێزەکانی پێشمەرگە ئۆپراسیۆنیان دەستپێکرد

وەزارەتی پێشمەرگە  ڕایگەیاند، ئەمڕۆ هێزەکانی پێشمەرگە و سوپای عێراق لە هەڵمەتێکدا کێوماڵی ڕۆژاوای دیجلەیان کرد.
وەزارەتی پێشمەرگە ڕاگەیاندراوێکی بڵاو کردەوە کە تێیدا هاتووە "بەرەبەیانی ئەمڕۆ، دووشەممە، 21ـی نیسانی 2025، هێزەکانی پێشمەرگە و سوپای عێراق، لە میحوەری 8، ڕۆژاوای دیجلەیان کێوماڵ کرد."
لە ڕاگەیەندراوەکەدا، ئاماژە بەوەش دراوە "لە ئۆپەراسیۆنەکەدا لیواکانی 8 و 27ـی پیادە و فەوجی کۆماندۆی فیرقەی 3ـی پیادەی وەزارەتی پێشمەرگە و لیوای 15ـی سوپای عێراق بەشداربوون و گەڕان و پشکنینێکی وردیان بەدوای مۆڵگە و حەشارگەکانی گرووپی تیرۆرستی داعشدا کرد."
 جەختیشی کردەوە "هەڵمەتەکە بەمەبەستی ڕاماڵین و پاککردنەوەی ناوچەکە لە پاشماوەکانی تیرۆریستان و دابینکردنی ئاسایش و سەقامگیریی زیاتر بۆ دانیشتوانی ناوچەکە و نەهێشتنی مەترسی و ڕێگریی لە چالاکی و جموجووڵی تیرۆریستان بووە."