پارتی و یەکێتی ڕێککەوتن

پارتی و یەکێتی لە دوایین کۆبوونەوەیان لەبارەی پێکهێنانی کابینەی دەیەمی حکومەتی کوردستان، باسی پڕۆژەی 'هەژماری من'یان کردووە و لەسەر چوار خاڵ ڕێککەوتوون، دوای ئەم ڕێککەوتنەش پڕۆژەکە لە سەرتاسەری کوردستان بێ جیاوازی جێبەجێ دەکرێت.

هەژماری من پڕۆژەیەکی گرنگی کابینەی نۆیەمی حکومەتی هەرێمی کوردستانە و ئامانجی سەرەکی بەبانکیکردنی مووچەیە، بەڵام پێشتر بە هۆکاری سیاسی ڕێگری دەکرا لە پارێزگاکانی سلێمانی و هەڵەبجە جێبەجێ بکرێت.

 لە ماوەکانی ڕابردووشدا دوای دوو کۆبوونەوەی مەسرور بارزانی، سەرۆکوەزیرانی کوردستان و بافڵ تاڵەبانی، سەرۆکی یەکێتی کە یەکێک لە تەوەرە سەرەکییەکانی گفتوگۆکانیان هەژماری من بووە، دواتر چوونی تیمێکی هەژماری من بۆ سلێمانی و پێدانی ڕوونکردنەوەی پێویست بە خودی بافڵ تاڵەبانی، نیگەرانییەکان لەبارەی پڕۆژەکە ڕەوینەوە.

لە دوایین کۆبوونەوەی شاندی دانوستانکاری پارتی و یەکێتی بۆ پێکهێنانی حکومەت کە ڕۆژی 17-4-2025 لە سلێمانی کرا، گفتوگۆی ورد لەبارەی پڕۆژەکانی هەژماری من و ڕووناکی کرا، یەکێتی و خودی بافڵ تاڵەبانی بە پڕۆژەی هەژماری ڕازی بوونە، هەر لە کۆبوونەوەکەدا لەسەر چوار خاڵ ڕێککەوتوون.

لە دوایین لێدوانیشیدا بافڵ تاڵەبانی ڕایگەیاند تەنانەت پڕۆژەکە دەوڵەمەندتریش دەکەن بۆ خزمەتکردن و سوودمەندبوونی زیاتری مووچەخۆران. یەکێتی گەیشتووەتە ئەو بڕوایەی هەژماری من پڕۆژەیەکی ستراتیژی و گرنگە  بۆ ئێستا و داهاتووی ئابووری  و خەڵکی کوردستان.

ڕێککەوتنی پارتی و یەکێتی ئەم چوار خاڵە لەخۆدەگرێت:

٠ پرۆژەی هەژماری من سەر بە وەزارەتی دارایی و ئابووریی حکومەتی کوردستان دەبێت. ئەمڕۆ بە نووسراوێکی فەرمی گواستنەوەی پڕۆژەکە ڕاگەیێنرا، وەزارەتیش سەرپشك دەبێت بۆ بەڕێوەبردنی پرۆژەکە لەبەر ڕۆشنایی یاسا و ڕێنمایە بەركارەكانی بانكی ناوەندیی عێراق.

٠  هەژماری بانكی مووچەخۆران پارێزراو دەبێت بەگوێرەی یاسای بانكی ناوەندی.  وەکو پێشتریش تیمی هەژماری من دڵنیاییان دابوو، پارەی مووچەخۆران لە هەژمارەکانیان بەهیچ شێوەیەک دەستکاری ناکرێت و پارەی ئاو و کارەبا و خزمەتگوزارییەکانی لێ ناگێڕدرێتەوە.

٠ حکومەت ڕێگە دەدات بانکی نوێ بێنە ناو پرۆژەکەوە و دەرگا بۆ سەرجەم بانکەکان کراوە دەبێت. تاوەکو ئێستا هەشت بانک لە پڕۆژەکەدا بەشدارن

٠ گرێبەستکردن لەگەڵ بانکەکان شەفاف دەبێت و لایەنە پێکهێنەرەکانی حکومەت ئاگاداری وردەکاری و ناوەڕۆکی گرێبەستەکانی پێشوو و داهاتوو دەبن.

سەرۆکوەزیران مەسرور بارزانی پێیوایە، بەبێ بوونی سیستمێکی بانکیی پێشکەوتوو، ئابووریی بەهێز دروست نابێت و وڵات پێشناکەوێت، بۆیە ئەوەی بەلایەوە گرنگە ئەوەیە ئەم سیستمە سەربکەوێت.

 ئامانجێکی سەرەکی دیکەشی ئەوەیە مووچەخۆران دووربن لە سزادانی سیاسی، هەر مووچەخۆرێک خاوەن هەژمارێکی بانکی خۆی بێت، فەرمانبەر منەتیان بەهیچ کەس و لایەنێک نەمێنێت و دووربن لە سزادانی سیاسی و هیچ لایەنێک نەتوانێت هەڕەشی بڕینی مووچەیان لێ بکات.

تاوەکو ئێستا لە کۆی زیاتر لە یەک ملیۆن فەرمانبەر و خانەنشین، 750 هەزار کەس خۆیان لە پڕۆژەی هەژماری من تۆمار کردووە و تەنیا 250 هەزار کەس ماون کە زۆربەیان لە سنووری پارێزگاکانی سلێمانی و هەڵەبجەن، لە وەزارەتی دارایی عێراقیشەوە هۆشداری ئەوە دراوە ئەگەر تاوەکو کۆتایی ئەمساڵ سەرجەمیان خۆیان تۆمار نەکەن مووچەیان ڕادەگیرێت، دوای نەمانی بەربەستەکانی بەردەم پڕۆژەکەش، تۆمارکردنی فەرمانبەران خێرا دەکرێت و مووچەی سەرجەمیان بەبانکی دەکرێت، بەمەش هیچ مەترسییەک لەسەر مووچەیان نامێنێت.