هه‌فته‌ی داهاتوو دوو رۆژ لە عێراق و رۆژێك لە هەرێمی كوردستان بۆ فەرمانبەرانی كریستیان لە دامودەزگاكانی حكوومەت پشووی فەرمی دەبێت، وەزارەتی پەروەردەی حكوومەتی هەرێمی كوردستانیش دەڵێت: " بۆ هەموو قوتابییانی خوێندنی سریانی یەك رۆژ پشوو دەبێت."
ئەمینداریەتیی گشتیی ئەنجوومەنی وەزیرانی عێراقی فیدراڵ، لە روونكردنەوەیەكدا لەسەر پەڕەی خۆی لە تۆڕی كۆمەڵایەتیی (فەیسبووك) بڵاوی كردووەتەوە: "ئەنجوومەنی وەزیران لە كۆبوونەوەی رۆژی 15/4/2025دا رەزامەندیی داوە، كە ڕۆژانی 20 و 21ی 4 (ده‌كاته یه‌كشه‌ممه و دووشه‌ممه)ی هه‌فته‌ی داهاتوو، پشووی فه‌رمی ده‌بێت بۆ سەرجەم فەرمانبەران لە پێكهاتەی كریستیانە لە عێراقدا، ئەویش بە بۆنەی (ڕۆژی هەستانەوە)."
ئاماژە بەوەش دراوە، پشووەكە هەموو فەرمانبەران ناگرێتەوە، تەنیا بۆ پێكهاتەی كریستیانە.
لای خۆیەوە، سەرچاوەیەكی ئاگادار لە ئەنجوومەنی وەزیرانی هەرێمی كوردستان راگەیاند: "لەبەر ئەوەی بڕیارێكی پێشووتر هەیە، بۆیە رۆژی يەكشەممە 20/4/2025، بە بۆنەی (ڕۆژی هەستانەوە)، بۆ فەرمانبەرانی پێكهاتەی ئایینیی كریستیان لە تەواوی هەرێمی كوردستان پشووی فەرمی دەبێـت."
سامان سیوەیلی، گوتەبێژی وەزارەتی پەروەردەی حكوومەتی هەرێمی كوردستان راگەیاند: "رۆژی یەكشەممە 20/4/2025، بۆ هەموو قوتابییانی خوێندنی سریانی پشوو دەبێت و لەو ڕۆژەدا تاقیكردنەوەشیان هەیە، بەڵام ئەوان تاقیكردنەوەكە ناكەن."
وەڵام بدەوه