ئاگادارییەکی گرنگ بڵاوکرایەوە

ئەمڕۆ شەممە 5ی 4ی 2025، بەڕێوەبەرایەتیی هاتوچۆی هەولێر ئاگادارییەكی بڵاو كردەوە و ڕایگەیاند: "بەهۆی دابەزینی پلەکانی گەرما، ئەمڕۆ لەچەند ناوچەیەکی سنووری پارێزگای هەولێر تەرزە باریوە، ئەگەری هەیە لەسەنتەری شاریش ببارێت، بۆیە ڕێنوێنیی شوفێران دەکەین ڕەچاوی ئەم خاڵانە بکەن لەکاتی بارینی تەرزە." 

ڕێنوێنییەكانی هاتوچۆی هەولێر بۆ شوفێران، ئەمانەن: 

1- لەکاتی بارینی تەرزە نابێت شوفێری بکرێت و ئەگەر لەکاتی شوفێری دابویت دەبێت ڕاستەخۆ ئۆتۆمبێلەکەت لە کەناری شەقام بوەستێنیت، چونکە ئەم تۆپە بەفرە بچووکانە دەبنە هۆی ئەوەی خلیسکان ڕووبدات لێکخشانی تایەی ئۆتۆمبێل لەگەڵ شەقام کەم ببێتەوە، هەروەها ئاستی بینین کەم ببێتەوە، ئەمەش ئەگەری ڕوودانی ڕووداوی هاتوچۆ زیاد دەکات."

2- ئۆتۆمبێلەکەت ببە گەراج یان شوێنێک سەقفی هەبێت یان دایپۆشە، بۆئەوەی ڕاستەوخۆ تەرزەکە بەر ئۆتۆمبێلەکە نەکەوێت شووشەکانی بشکێنێت یان زیان بە ئۆتۆمبێلەکەت بکەوێت.