ئه‌نجوومه‌نى نوێنه‌رانى عێراق خشته‌ى دانیشتنى ئه‌مڕۆ (چوارشه‌ممه 26ى 3ى 2025)ى بڵاو كرده‌وه، كه تێیدا له یه‌كه‌م بڕگه‌دا ده‌نگدانه له سه‌ر به‌پارێزگابوونى هه‌ڵه‌بجه.
به‌پێی ئه‌و خشته‌یه‌ی ڕاگه‌یاندنى ئه‌نجوومه‌نى نوێنه‌رانى عێراق بڵاوی كردووه‌ته‌وه، ئه‌مڕۆ چوارشه‌ممه كاتژمێر 8ى ئێواره دانیشتنى په‌رله‌مان ده‌ست پێده‌كات.
له یه‌كه‌م بڕگه‌ى دانیشتنه‌كه‌دا، ده‌نگ له‌سه‌ر به‌پارێزگابوونى هه‌ڵه‌بجه ده‌درێت، هەرچەندە بڕیار بوو شەوی رابردوو دانیشتنی پەرلەمانی عێراق بەڕێوە بچێت لەبارەی چەند تەوەرێك كە یەكێك لە بڕگەكان، بریتی بوو لە دەنگدان بۆ بەپارێزگاكردنی هەڵەبجە، بەڵام بەهۆی ئەوەی دانیشتنەكە هاوكات بوو لەگەڵ یاریی تۆپی پێی (عێراق - فەڵەستین)، دانیشتنەكە ڕێژەی یاسایی تەواو نەكرد و گومان دەكرێ پەرلەمانتارەكان لەبەر سەیركردنی یاریی تۆپی پێ، بەشدارییان لە دانیشتنەكە نەكردبێت.
له بڕگه‌كانى دیكه‌ى دانیشتنه‌كه هاتووه، گفتوگۆ و خوێندنه‌وه‌ى دووه‌م بۆ پرۆژه‌یاسای حه‌شدى شه‌عبی ده‌كرێت، له‌گه‌ڵ خوێندنه‌وه‌ى چه‌ند پرۆژه‌یاسایه‌كی تر.
پێشتر له، 24ی 3ی 2025، د. شاخەوان عەبدوڵا، جێگری سەرۆكی پەرلەمانی عێراق ڕایگەیاند: "ئێستا، بەسوپاسەوە ڕەزامەندیی بەرێزان سەرۆکی پەرلەمان و جێگری یەکەمی سەرۆکی پەرلەمانی عێراقم وەرگرت بۆ ئەوەی دەنگدان لەسەر پڕۆژەیاسایی بەپارێزگابوونی هەڵەبجە بخرێتە بەرنامەی کاری پەرلەمانەوە بۆ دانیشتنی سبەی ڕۆژی سێشەممە."
ئەوەش دەخاتە ڕوو، كە "بەوەش داوایەکی سەرۆک بارزانی لە سەرۆکایەتیی پەرلەمان و ئەو بەڵێنەی دابومان بە نوێنەر و کەسایەتییەکانی هەڵەبجە جێبەجێ کرا و لەگەل فراکسیونەکانی ناو پەرلەمانیش قسەمان کردووە بۆ ئەوەی پڕۆژەیاساكە تێپەرێت.
وەڵام بدەوه