سبەی مووچەی مانگی دوو دەگاتە هەرێمی كوردستان

بریكاری دەستلەكاركێشاوەی وەزارەتی دارایی عێراق رای گەیاند، بڕیارە سبەی مووچەی مووچەخۆرانی هەرێمی كوردستان بۆ مانگی شوبات لەلایەن بەغداوە رەوانەی هەرێم بكرێت. 

ئەمشەو سێشەم 11ی ئاداری 2025، رێباز حەملان بریكاری دەستلەكاركێشاوەی وەزارەتی دارایی عێراق ڕایگەیاند، قسەی لەگەڵ نوێنەرایەتی حكوومەتی هەرێمی كوردستان كردووە لە بەغدا، پێیان راگەیاندووە سبەی بڕیار لە خەرج كردنی مووچەی مانگی شوباتی مووچەخۆران دەدرێت. 

نوێنەرایەتیی حكوومەتی هەرێمی كوردستان لە بەغدا قسەیان لەگەڵ سوودانی كردووە و ئەویش فەرمانی داوە بە وەزارەتی دارایی حكوومەتی فیدراڵ، كە مووچەی مانگی شوبات خەرج بكات. 

حەملان گوتی، بەپێی قسەی نوێنەرایەتیی حكوومەتی هەرێم لە بەغدا، ئەگەری زۆرە سبەی مووچەی مووچەخۆران بۆ مانگی شوبات خەرج بكرێت. 

ئەم قسانەی حەملان لە كاتێكدایە، سەرەتای ئەمساڵ هەردوو شاندی دانوستانكاری حكوومەتی هەرێمی كوردستان و عێراقی فیدراڵ رێككەوتنیان كرد كە ئەمساڵ مووچە كێشەی نەبێت و لیستی مانگی یەكیش بكرێتە بنەما بۆ ناردنی مووچەی مانگەكانی تر و دواكەوتن روو نەدات، بەڵام وەك هەمیشە وەزیری دارایی عێراق لەمپەری لە بەردەم ناردنی مووچەی مانگی شوباتی مووچەخۆرانی هەرێم دروست كردووە. 

جێگەی ئاماژەیە، دوێنی شەو جۆی وێڵسن كۆنگرێسمانی ئەمەریكا و كەسایەتیی سیاسیی نزیك لە ترەمپ لە تویتێكدا گوتی، تەیف سامی وەزیری دارایی عێراق بەرپرسی برسیكردن و نەناردنی مووچەی كوردانی عێراقە، دەبێت ئەمە بوەستێنرێت و ترەمپیش چارەی دەكات.