سەرۆک وەزیران، مەسرۆر بارزانی ئه‌مڕۆ پێشوازی له‌ خاتوو باربارا لیف یاریدەدەری وەزیری

دەرەوەی ئەمەریكا بۆ كاروباری ڕۆژهەڵاتی ناوەڕاست كرد.
له‌ كۆبوونه‌وه‌کەدا پەرەپێدانی په‌يوه‌ندييه‌كانى ئه‌مه‌ريكا و هه‌رێمى كوردستان و دوايين گۆڕانکاری و پەرەسەندنەکانی دۆخى سياسيى عێراق تاووتوێ كران.

یاریدەدەری وەزیری دەرەوەی ئەمەریكا، پابەندبوونی وڵاتەکەی بە بەردەوامبوون لە پشتیوانیکردنی هەرێمی کوردستان و پێشمەرگە دووپات کردەوە. گوتیشی هەوڵەکانمان چڕ دەکەینەوە لە پێناو چارەسەرکردنی کێشەکانی نێوان هەرێمی کوردستان و حکومەتی فیدرالی، بەتایبەتی ناکۆکییەکانی پەیوەندیدار بە پرسی نەوت وگاز، کە پێویستە بە گفتوگۆ چارەسەر بکرێن، چونکە چارەسەرنەکردنیان، کاریگەریی خراپی لە سەر ئارامی و سەقامگیریی عێراق دەبێت.

هەروەها کورتەیەک دەربارەی چاکسازییەکانی کابینەی نۆیەم لە بواری هەمەجۆرکردنی ئابووری و سەرچاوەکانی داهات و بنیاتنانی ژێرخانێکی بەهێز خرایە ڕوو.

لەبارەی پەیوەندییەکانی هەرێمی کوردستان و حکومەتی فیدراڵیش، جەخت لەوە کرایەوە، کە خەڵکی کوردستان، قوربانییەکی زۆری لە پێناو مافە ڕەواکانی داوە، بۆیە ئامادە نییە لە ژێر هیچ فشارێکدا، دەستبەرداری ماف و شایستە دەستوورییەکانی ببێت. خواستی هەرێمی کوردستانیشمان بۆ چارەسەرکردنی بنەڕەتی کێشەکان لە سەر بنەمای دەستوور، دووپات کردەوە.

گۆڕانی کەشو هەوا و کاریگەرییە نەرێنییەکانی لە سەر عێراق و هەرێمی کوردستان ، بایەخدان بە وزەی ژینگەدۆست و پاک و جێگرەوە، برەودان بە وەبەرهێنانی ئەمەریکی و گرنگیدان بە کەرتی تایبەت لە هەرێم، چەند تەوەرێکی دیکەی کۆبوونەوەکە بوون کە ‌باڵیۆزی ئەمەریکا لە عێراق خاتوو ئەلينا ڕۆمەناوسکی و كونسولى گشتيى ئه‌مه‌ريكا له‌ هه‌رێمى كوردستان بەڕێز ئیرڤ ھیکس، ئامادەی بوون.