سێ شەپۆلی بەفروباران هەرێمی کوردستان دەگرێتەوە

شارەزایەکی بواری کەشناسی ئاشکرای کرد مانگی رەمەزان مانگێکی تەڕ و باراناوی دەبێت و سێ شەپۆلی بەفروبارانی یەک بە دوای یەک روو لە هەرێمی کوردستان دەکات.

ئەمڕۆ هەینی 28/2/2025، هەڤاڵ سەدیق گەڵۆزی، شارەزای بواری کەشناسی بڵاوی کردەوە: "لە سبەینێ شەممە 1/3/2025، کەشێکی ناسەقامگیر ڕوو لە بەشێک لە ناوچە شاخاوییه سنوورییەکانی سنووری پارێزگای دهۆک، سۆران، ئیدارەی ڕاپەڕین و بەشێک لە ناوچە شاخاوییە سنوورییەکانی پارێزگای سلێمانی دەکات و لە کاتەکانی نیوەڕۆ بەدواوە بۆ درەنگانی شەوی شەممە لەسەر یەکشەممە شەپۆلێکی کورتخایەنی بەفروبارانبارین ڕوو لەم ناوچانە دەکات و لە بەشێک لە ناوچە شاخاوییەکانی دهۆک، سۆران، حاجی ئۆمەران، مەرزی کێلێ، ماوەت و پێنجوین هەندێ شوێنی دیکە بە دیاری نەکراوی ئەگەری بەفربارینێکی کەم هەیە لە هەندی لە ناوچە شاخاوییەکانی دیکەش ئەگەری نمەباران هەیە."

هەروەها ئەوەشی خستووەتە روو: "شەپۆلی دووەم لە ڕۆژی چوارشەممە 5/3/2025، هەرێمی کوردستان دەکەوێتە ژێرکاریگەری نزمەپەستانی دەریای سوور و دەریای سپی ناوەڕاست شەپۆلێکی بەفروبارانبارین و هەورەبرووسکەی بەهێز و تەرزە تەواوی ناوچە جیاوازەکانی هەرێمی کوردستان و عێراق دەگرێتەوە و لە ڕۆژی هەینی 7/3/2025، هەردوو نزمەپەستانی دەریای سوور و دەریای ناوەڕاست بە یەک دەگەن و تێکەڵ دەبن لە سەرجەم ناوچەکانی هەرێمی کوردستان ئەگەری بارانبارینی مامناوەند بۆ بارانی بەخووڕ هەیە، شەپۆلەکەی دەریای سووری بە پلەیەک کاریگەری لەسەر ناوچەکانی ئیدارەی گەرمیان، هەڵەبجە، سلێمانی، ڕاپەڕین و هەولێر دەبێت و لە هەندێ شوێن لەم ناوچانە لەماوەی چوار ڕۆژدا پێشبینی دەکرێت لەنێوان 30 بۆ 50ملم باران ببارێت، بەپلە دووش کاریگەری لەسەر ناوچەکانی پارێزگای دهۆک، ئیدارەی زاخۆ، موسڵ، ئیدارەی سۆران و ناوچە شاخاوییەکانی هەولێر دەبێت."

ئەو شارەزایەی بواری کەشناسی ئاماژەشی بەوە داوە کە شەپۆلی سێیەم لەنێوان 12 بۆ 15ی3ی2025 دەبێت، بەڵام تا ئێستا جێگیر نیە.