هەواڵی خۆش لەبارەی هەناردە کردنەوەی نەوتی هەرێمی كوردستان گەیشت

ئەمڕۆ (پێنجشەممە 27ى 2ى 2025) ئاژانسى هه‌واڵیی «تاس» لە زاری سێرگی تسڤێلێڤ، وەزیری وزەی ڕووسیا، بڵاویکردەوە، هەرێمی کوردستان و حکوومەتی فیدراڵی بە سەرکەوتوویی ناکۆکییەکانی نەوتیان یەکلایی کردووەتەوە، بەمەش کۆمپانیا ڕووسییەکان دەتوانن پڕۆژەکانیان لە ناوچەکە دەست پێبکەنەوە.
کۆمپانیای ڕۆسنەفت کە گەورەترین بەرهەمهێنەری نەوتی ڕووسیایە، لە ڕیزی ئەو کۆمپانیایانە بوو کە کارەکانیان لە ناوچەکە ڕاگرت. بە هۆکاری ئەمنی لەکاتی ئەنجامدانی کارەکانی لەنزیک سنوورەکان لەگەڵ سووریا، بەشێک لە كاره‌كانیان ڕاگرتووە.
محەمەد شیاع سوودانی، سەرۆک وەزیرانی عێراق، ڕۆژی چوارشەممە لەگەڵ تسیڤلێڤ کۆبووەوە؛ کە تیایدا باس لە هاوکاری لە بوارە جیاجیاکان کرا، لەوانەش نەوت و وزە.
وەزیری وزەی ڕووسیا، لە پەراوێزی لیژنه‌ى هاوبه‌شى حکوومەتی ڕووسیا و عێراق بۆ هاوکاری بازرگانی، ئابووری، زانستی و تەکنیکی، ڕۆژی چوارشەممە گوتی: "ڕووسیا و عێراق شیکاری بۆ ڕێککەوتنەكانى نێوان هەردوو وڵات دەکەن و بەدواداچوون بۆ ئەگەری واژۆکردنی ڕێککەوتنی نوێ دەکەن؛ بۆ پێشخستنی هاوکاری بازرگانی چالاکتر".