پەیامێکی گرنگ لە وەزارەتی پێشمەرگەوە

ئەمڕۆ تیرۆرستانی داعش لە سنووری قەزای دوزخورماتوو پەلاماری چەند شوانێك دەدەن و لە ئەنجامدا ڕووبەڕووبوونەوە لەنێوان شوانەكان و داعشەكاندا دروست دەبێت و بۆ ئەو مەبەستەش هێزی پێشمەرگەی كوردستان بەهانایانەوە دەچێت و شوانەكان ڕزگار دەكات و تیرۆریستانی داعشیش بۆ شوێنێكی نادیار هەڵدێن.
لەمبارەیەوە، وەزارەتی پێشمەرگە ڕایگەیاند: "دوای ئەوەی بەرەبەیانی ئەمڕۆ چوارشەممە 19ی 2ی 2025، شانەیەکی نووستووی گرووپی تیرۆرستی داعش لە سنووری گوندەکانی دوزخورماتوو بە دیاریکراوی لە دەورووبەری گوندی دوراجی و غەررە، لە کردەوەیەکی ترسنۆکانەدا پەلاماری چەند شوانکارێکیان دا، لەئەنجامدا ڕووبەرووبوونەوە لە نێوانیاندا دروست بووە."
ڕاشیگەیاند: "دوای ئاگادارکردنەوەی هێزی پێشمەرگەی کوردستان لەو سنوورە دەستبەجێ هێزێکی پێشمەرگەی کوردستان بەمەبەستی بە هاناوەچوونی شوانەکان و خەڵکی ناوچەکە ڕوویان لە شوێنی ڕووبەڕووبوونەوەکە کرد و توانرا شوانەکان بە سەلامەتی بگەڕێندرێنەوە بۆ ناوچەکانی خۆیان و تیرۆرستەکانیش بۆ شوێنی نادیار هەڵهاتن."
وەزارەتی پێشمەرگە جەخت لەوەش دەكاتەوە، كە "هێزی پێشمەرگەی کوردستان، دڵنیایی دەدات، کە پێشمەرگە هەمیشە چاوکراوەیە و بە ورە و دەستێکی پۆڵاین ڕووبەڕووی هەموو جولە و کردەوەیەکی تیرۆرستانی داعش دەوستێتەوە."