لەسەر رێگری لە جوتیارانی کورد سوودانى لیژنه‌یه‌كی باڵاى پێكهێنا

خانەی میدیای ئه‌منیی فەرماندەیی ئۆپەراسیۆنە هاوبەشەکانى عێراق، ڕاگه‌یاندراوێكی بڵاو كرده‌وه‌ و تێیدا ده‌یسه‌لمێنێت كه‌ هێزه‌كانى سوپای عێراق دوێنێ له‌ سنوورى پارێزگاى كه‌ركووك ڕێگرییان له‌ جووتیاره‌ كورده‌كان كردووه‌ كارى خۆیان ئه‌نجام بده‌ن، به‌هۆى دروستبوونى ئاڵۆزی و هێرشكردنه‌ سه‌ر جووتیاره‌ كورده‌كان، سوودانى لیژنه‌یه‌كی باڵاى پێكهێنا و ڕه‌وانه‌ى كه‌ركووكى كرد.
خانەی میدیای ئه‌منیی فەرماندەیی ئۆپەراسیۆنە هاوبەشەکانى عێراق، ئه‌مڕۆ سێشه‌ممه‌ 18ى شوباتى 2025 ڕاگه‌یاندراوێكی بڵاو كرده‌وه‌ كه‌ تێیدا هاتووه‌: "فەرماندەی گشتیی هێزە چەکدارەکان بەدواداچوونی بۆ بارودۆخی ئەو ڕووداوە کرد کە دوێنێ لە سنوورى پارێزگای کەرکووک ڕووی دا، دوای ڕێگریکردن لە جووتیاران لە پراکتیزەکردنی کارەکانیان، فەرماندەیی ئۆپەراسیۆنە هاوبەشەکانی ڕاسپارد بۆ پێکهێنانی لیژنەیەکی باڵای لێکۆڵینەوە کە نوێنەرایەتی هەموو لایەنەکان بکات بۆ بەدواداچوون و لێكۆڵینه‌وه‌كردن له‌ سەرجەم بارودۆخی ئەم ڕووداوە".
محه‌ممه‌د شیاع سوودانى، هەروەها فەرمانی ده‌ركرد به‌ ناردنی بریکاری وەزیری داد بۆ پارێزگاری کەرکووک کرد بۆ گرتنەبەری ڕێوشوێنی پێویست سەبارەت بەو زەویانەی کە بەرژەوەندی هاوبەشی نێوان سنوورى عێراق و هەرێمی کوردستانە.
له‌ ڕاگه‌یاندراوه‌كه‌دا ستایشی ڕۆڵی هێزە ئەمنییەکان ده‌كرێت لە سوپا و ناوخۆ و پێشمەرگە و هێزەکانی حه‌شدی شه‌عبی و دەزگا ئەمنییەکان و هەواڵگرییەکان پابەندبن بە یاسا و ڕێنماییەکان و دان به‌خۆیاندا بگرن و ژیرانە و نیشتمانپەروەرانە مامەڵە بکەن، هاوكات داوا لە هەموو لایەنەکان و هێزە سیاسییەکان دەکرێت کە حیکمەت و هێمنی و ئارامی بەکاربهێنن و بەرژەوەندییە باڵا نیشتمانییه‌كان لە پێشینە دابنێن و پابەند بن بە یاسا و دەستوور و کار بۆ پاڵپشتیی هێزە ئەمنییەکان لە پاراستنی هەموو دەستکەوتە ئەمنییەکان و ئامانجە نیشتمانییە هاوبەشەکاندا بکەن.
دوێنێ دووشەممە 17ی شوباتی 2025، لە كاتێكدا جووتیارانی سنووری ناحیەی سەرگەڕانی سەر بە قەزای دوبز لە پارێزگای كەركووك، دەیانویست بچنە سەر زەوی و زاری خۆیان و كاری تێدا بكەن، كەچی لە لایەن سوپای عێراق و میلیشیاكانەوە بە هەمەر هێرشیان كرایە سەر و جگە لەوەی ڕێگرییان لێ كرا، لە هەندێك تۆماری ڤیدیۆییدا دەردەكەوێت كە هەوڵی خنكاندنی جووتیارانی كوردیش دەدرێت