گرێبەستێك لە نێوان كۆمپانیایەکی ئیتاڵی و هەرێمی كوردستان واژووکرا، كۆمپانیا ئیتاڵیەكە پڕۆژەیەکی گەشتیاری لە دەڤەری سۆران بنیات دەنێت.
بە ئامانجی کارکردنی هاوبەش لە سێکتەرە جیاوازەکان و وەبەرهێنان کردن لە هەردوولا، ئەمڕۆ سێشەممە، 11ی 2ی 2025، یەکەم کۆڕبەندی ئابووری نێوان وڵاتی ئیتاڵیا و هەرێمی کوردستان لە پەرلەمانی ئیتاڵیا لە شاری رۆما سازکرا بۆ ماوەی دوو رۆژیش بەردەوام دەبێت.
لاوەند مەموندی، ئەندامی ئەنجومەنی کارگێڕی و نوێنەری ژووری بازرگانی و پیشەسازی هەولێر بە (باسنیوز)ی راگەیاند: " لە یەکەم رۆژی ئەم کۆڕبەندەدا، گرێبەستێك لە نێوان (Visit Kurdistan) و کۆمپانیایەکی ئیتاڵی بۆ پێشخستنی کەرتی گەشتیاری لە هەرێمی کوردستان واژوو کرا ، تایبەتە بە بنیاتنانی پڕۆژەیەکی گەشتیاری لە دەڤەری سۆران و وا بڕیارە لە شەش مانگی داهاتوودا کۆمپانیاکە دەست بە کارەکانی بکات."
ئاماژەی بەوەش دا، بەهۆی بوونی پەیوەندیەکی بەهێزی سیاسی لە نێوان وڵاتی ئیتاڵیا و هەرێمی کوردستان، گواستنەوەی ئەو پەیوەندیە بۆ فراوانترکردنی پەیوەندیە ئابووری و بازرگانیيەکانی هەردوولا، ئەم کۆڕبەندە سازدەکرێت، گوتیشی: "سوود وەرگرتن لە دەرفەتەکانی وەبەرهێنان لە نێوان هەردوولا و هەروەها پەیوەندی و ئاڵوگۆڕی بازرگانی هەنگاوی زیاتر بچێتە پێش، ئامانجی سازدانی ئەم کۆڕبەندەیە و بڕیارە چەند گرێبەست و لێكتێگەیشتن لەنێوان وەبەرهێنەران و بازرگانانی ئێمە و ئیتاڵیا بكرێت."
وەڵام بدەوه