هەواڵی خۆش بۆ فەرمانبەران گەیشت

بەپێی ئەو ناوانەی گەڕاونەتەوە، لەم هەفتەیە فەرمانبەران و مامۆستایانی سلێمانی 100 هەزار پارچە زەوی وەردەگرن.


ئەمڕۆ یەكشەم نۆی شوبات، سەرچاوەیەك لە وەزارەتی شارەوانی، رایگەیاند، دوای گەڕانەوەی ناوەكان لە ئەنجوومەنی وەزیران، لەناو لیستەكە نزیكەی 100 هەزار زەوی بەسەر فەرمانبەرانی سلێمانی و هەڵەبەجە و گەرمیان و ڕاپەڕین دابەش دەكات.


ئەوەش زانراوە لەو 216 هەزار ناوەی بۆ وەجبەی دووەم ناویان گەڕاوەتەوە، 88 هەزار مامۆستا ناویان هەیە و لەم هەفتەیە زەوی وەردەگرن.


دوێنێ‌ پارێزگای هەولێر ڕەزامەندیی ئەنجوومەنی وەزیرانی بۆ پێدانی زەوی بە 64 هەزار كارمەندی وەزارەتی ناوخۆ راگەیاند كە گەڕاوەتەوە شارەوانی، ئەو 64 هەزار ناوە پۆلیس و زێرەڤانی و فەرمانبەرانی ناوخۆ دەگرێتەوە.


لە كۆتایی مانگی ڕابردوودا، لیستی ناوی نزیكەی 200 هەزار فەرمانبەری شارستانی و سەربازی لەلایەن ئەنجوومەنی وەزیران، ڕەزامەندیی پێدانی زەوییان بۆ دەرچوو.


ڕۆژی 27ی 03ی 2024، ئەنجوومەنی وەزیرانی هەرێمی كوردستان بڕیاری دا بە پێدانی زەوی بەو فەرمانبەرانەی كە سوودمەند نەبوونە، لە رۆژی 31ی 5ی 2024دا وەزارەتی شارەوانی رێنوێنیی ژمارە 2ی ساڵی 2024ی دابەشكردنی زەوی بەسەر فەرمانبەران لە رۆژنامەی وەقایعی فەرمیی كوردستان بڵاو كردەوە.