شارەزایەکی بواری کەشناسی ئاشکرای کرد کە دوو شەپۆلی بەفروباران لەسەر نەخشەکانی کەشوهەوا بەدیار کەوتووە و پێشبینی دەکرێت لە ناوەڕاستی هەفتەی داهاتوو بەفروباران سەرتاسەری ناوچە جیاوازەکانی هەرێمی کوردستان بگرێتەوە.
ئەمشەو سێشەممە 28/1/2025، هەڤاڵ سەدیق گەڵۆزی، شارەزای بواری کەشناسی بڵاوی کردەوە: "بە گوێرەی نوێترین پێشبینییە سەرەتاییەکانی سەنتەری کەشناشی (ئەورووپی، ئەمریکی، کەندی و کۆری) لە 10 ڕۆژی یەکەمی مانگی شوبات دوو شەپۆلی بەفروباران لەسەر نەخشەکانی کەشوهەوا و ڕاداری کەشناسی بەدیار کەوتووە و پێشبینی دەکرێت لە ناوەڕاستی هەفتەی داهاتوو سێشەممە لەسەر چوارشەممە شەپۆلێکی بەفروبارانی زۆرباش سەرتاسەری ناوچە جیاوازەکانی هەرێمی کوردستان بگرێتەوە."
ئاماژەشی بەوە داوە: "لەگەڵ هاتنی ئەو شەپۆلی بارانبارینە بارستەهەوایەکی ساردی جەمسەری دادەبەزێتە ناوچە شاخاوییەکانی هەرێمی کوردستان (هەولێر، سلێمانی، دهۆک، هەڵەبجە، سۆران و ڕاپەڕین) پلەکانی گەرما بەشێوەیەکی بەرچاو دابەزین بەخۆیەوە دەبینێت و پێشبینی دەکرێت شەپۆلێکی تری چڕی بەفربارین ناوچە شاخاوییەکان بگرێتەوە، هاوشێوەی شەپۆلی بەفربارینەکەی 20/1/2025 کە پێشبینی دەکرێت بەفر لەهەندێ سەنتەری شاروشارۆچکەکانی هەرێمی کوردستان ببارێت."
روونیشی کردووەتەوە: "ئەگەر هەیە لە شەپۆلی دووەم بەهۆی قوڵبوونەوە و بەهێزی بارستە هەوای ساردی جەمسەری بۆ ناوچەکانی باکووری کوردستان و ڕۆژهەڵاتی کوردستان، تورکیا، ئێران و وڵاتانی شام بەفر لە بیابانەکانی ئەنبار ڕۆژئاوای هەولێر ببارێت."
هەروەها ئەو شارەزایەی بواری کەشناسی ئاماژەشی بەوە داوە: "ئێستا شەپۆلەکە جێگیر بووە و لە ڕۆژانی داهاتوو کاریگەری شەپۆلەکە زیاتر ڕووندەبێتەوە بۆ تەواوی ناوچە جیاوازەکانی هەرێمی کوردستان."
وەڵام بدەوه