شارەزایەكی كەشناسی لەبارەی كەشوهەوای ڕۆژانی داهاتوو ڕایدەگەیەنێت، بارستەھەوایەکی سارد و شەپۆلێکی لاواز بۆ مامناوەندی بەفربارین لە رۆژھەڵاتی دەریای رەشەوە بۆ سەر ناوچە شاخاوییەکانی ھەرێمی کوردستان درێژ دەبێتەوە.
ئەمڕۆ یەکشەممە 19/1/2025، ئاراس جەبار، شارەزای كەشناسی، لەبارەی كەشوهەوای ڕۆژانی داهاتوو ڕایگەیاندووە: "ئێوارەی ئەمڕۆ یەکشەممە، بارستەھەوایەکی سارد و شەپۆلێکی لاواز بۆ مامناوەندی بەفربارین لە رۆژھەڵاتی دەریای رەشەوە بۆ سەر ناوچە شاخاوییەکانی ھەرێمی کوردستان درێژ دەبێتەوە، سەرەتا ناوچە شاخاوییەکانی پارێزگای ھەولێر و دهۆك دەگرێتەوە، سبەی دووشەمە 20/1/2025 ناوچەکانی ئیدارەی راپەڕین و پارێزگای سلێمانی و ھەڵەبجە دەگرێتەوە، ھەروەھا پلەی گەرما بەراورد بە ئەمڕۆ 5 تا 6 پلە نزم دەبێتەوە و بای رۆژھەڵات و باشووری رۆژھەڵاتیش بەخێرایی 15-35کم لە کاتژمێرێکدا چالاک دەبێت.“
دەشڵێت: "بەفربارینەکە بەشێوەی کڕێوە سەرجەم ناوچە شاخاوییەکانی پارێزگای ھەولێر، سلێمانی، ئیدارەی راپەڕین و بەشێکی ناوچە شاخاوییەکانی رۆژھەڵاتی پارێزگای دھۆک دەگرێتەوە، رێژەكەی بە تایبەت لە ناوچە سنوورییەکانی حاجی ئۆمەران و دەڤەری پشدەر و پێنجوێن زیاتر دەبێت، هەرچی سەنتەری شاری سلێمانییشە، ئەگەری بارینی بەفرێکی کەمی بە رێژەی 0.5 بۆ 2 سانتیمەتر هەیە."
ئەو شارەزایەی كەشناسی باسی لەوەش كرد، سبەی ئێوارە کاریگەریی ئەم شەپۆلە لەسەر ناوچەکانمان کۆتایی دێت، سەبارەت بە ناوچەکانی گەرمیان و کەرکووک و سەنتەری پارێزگای ھەولێر و دھۆکیش لە ماوەی ئەم شەپۆلەدا، ئاسمان ھەوری تەواو دەبێت و کەش سارد دەبێت، بەڵام ئەگەری بارانبارین لاوازە و پێشبینی ناکرێت باران و بەفر لەو ناوچانەدا ببارێت.
ئاراس جەبار، ئەوەشی خستە ڕوو، دوابەدوای شەپۆلی باران و بەفرەکە، بەھۆی زیادبوونی کاریگەریی بەرزەپاڵەپەستۆی سیبیری، شەوی دووشەممە لەسەر سێشەممە بای باکووری رۆژھەڵات، کە وشکەسەرمایەکی زۆری لەگەڵدایە، لە ناوچەکانی سلێمانی و راپەڕین و ناوچە شاخاوییەکانی رۆژھەڵاتی ھەرێمی كوردستان بە گشتی بە خێرایی 15-45 کیلۆمەتر لە کاتژمێرێکدا چالاک دەبێت، بەھۆیەوە پلەی گەرمی بە رێژەیەکی بەرچاو لە ناوچە شاخاوییەکان بۆ ژێر سفر نزم دەبێتەوە و بەستن و شەختە ڕوو دەدات، کاریگەریی ئەو با و وشکەسەرمایەش تا کۆتایی ئەم ھەفتەیە بەردەوام دەبێت.
وەڵام بدەوه