پێنج پارتی سیاسی لە خانەقین دژ بە بچووككردنەوەی سنووری ئیداریی قەزاكە و دروستكردنی قەزای نوێ، بەیاننامەیەكی هاوبەش بڵاو دەكەنەوە و پێیان وایە هیچ بیانوویەك نییە بۆ ئەو هەوڵانە.
هەریەك لە یەكێتیی نیشتمانیی كوردستان، پارتی دیموكراتی كوردستان، رێكخراوی بەدر، پارتی سۆسیالیست دیموكراتی كوردستان و حزبی شیوعیی كوردستان، لەسەر ئاستی قەزای خانەقین بەیاننامەیەكیان بڵاو كردووەتەوە و تیِیدا ئاماژە بەوە دەكەن، بڕیاری بە قەزاكردنی جەلەولا و قەرەتەپە و هەوڵدان بۆ دروستكردنی شارەدێی تر، لەسەر بنەمای لێكۆڵینەوەی پێویست نەكراون و پێشێلكاریی مافی دانیشتووان و پێكهاتەكانی خانەقینە.
ئاماژە بەوەش دەكات، ئەم هەنگاوە دەبێتە هۆكاری زیادكردنی ئاڵۆزیی سیاسی و كۆمەڵایەتی و زیان بە بنیاتی كۆمەڵایەتی و پێكهاتەیی ناوچەكە دەگەیەنێت.
خاڵێكی تر كە بەیاننامەكە دووپاتی لێ كردووەتەوە، پێوەستە بە مادەی (١٤٠)ـی دەستووری هەمیشەیی عێراق و ئاماژە بەوە دەكەن، خانەقین یەكێكە لە ناوچە جێناكۆكەكانی نێوان حكومەتەكانی عێراق و هەرێمە و نابێت پێش یەكلاكردنەوەی چارەنووسیان، گۆڕانكاریی لە سنووری ئیدارییاندا بكرێت.
داواش لە ئەنجوومەنی وەزیران و ئەنجوومەنی پارێزگای دیالە و حكوومەتی خۆجێی دەكەن كە پاشگەز ببەنەوە لە هەر هەنگاوێك "بۆ پارچە پارچەكردنی قەزای خانەقین و كەمكردنەوەی رۆڵی ئیداریی قەزاكە".
هاوكات داواش دەكەن لە بەرانبەردا، پڕۆژەی زیاتری خزمەتگوزاریی لە شارۆچكەكەدا ئەنجام بدەن و ژێرخانی خزمەتگوزارییەكەی بەهێز بكەن.
لە دانیشتنی كۆتا ڕۆژی ساڵی رابردووی ئەنجوومەنی پارێزگای دیالە، بڕیاری دا هەریەكە لە قەزاكانی جەلەولا، قەرەتەپە و بەنی سەعد بكرێن، بە قەزا و شارەدێیەكی نوێ بەناوی "حەمرین" بهێنرێتە كایەوە.
وەڵام بدەوه