قایمقامی ناوەندیی هەولێر ئاشكرای دەكات، بەهۆی پیسكردنی ژینگە و سكاڵای هاووڵاتییانەوە، بەشێكی خاوەنی مۆلیدەكان سزا دراون و بەردەوامیشن لە چاودێریكردنیان.
ئەمڕۆ سێشەممە 10/12/2024، نەبەز عەبدولحەمید، قایمقامی قەزای ناوەندیی هەولێر، رایگەیاند: "ئەو مۆلیدە ئەهلییانەی سەرپێچییان هەبێت، سەرپێچیی ژینگەیی و دووكەڵ و بۆنی ناخۆشیان هەبێت، یان هاووڵاتییان سكاڵایان لەسەر هەبێت، سزا دراون و رێكاری سزادانیش بەردەوامە."
لەناو هەولێر زیاتر لە هەزار مۆلیدەی ئەهلی هەیە و لەدەوروبەری هەولێریش زیاتر لە 900 مۆلیدە هەیە.
ئاماژەی بەوەش دا، لەمساڵدا ژمارەیەكی زۆری خاوەن مۆلیدەكان سزا دراون، گوتیشی: "بەشێكی زۆری مۆلیدەكان سزا دراون، تەنیا سزا و غەرامەی دارایی نییە، بەڵكوو لە رێگەی داواكاریی گشتی بەشێكیان رووبەڕووی دادگا كراونەتەوە، هەندێكیان كەیسەكانیان یەكلایی كراوەتەوە و هەندێكیش لە دادگا ماون."
قایمقامی هەولێر داوای لە هاووڵاتییان كرد، لە هەر شوێنێك سەرپێچیی مۆلیدەكانیان بینی، لێژنەكانی قایمقامیەت و ئەنجوومەنی مۆلیدەكانی لێ ئاگادار بكەنەوە، بۆ ئەوەی رێكاری توندیان بەرامبەر بگیرێتە بەر.
وەڵام بدەوه