لە تۆڕە کۆمەڵایەتییەکان ڕێکلام بۆ جۆرە سۆپایەک دەکرێت و دەگوترێت بە گاز و نەوت و ڕۆنی پیس کار دەکات، پسپۆڕێکی بواری ژینگەیی مەترسی بەکارهێنانی ئەم جۆرە سۆپایە دەخاتە ڕوو و دەڵێت: "وەک دانای پاڵاوگەیەکی بچووکە لە ماڵەکان."
لە تۆڕە کۆمەڵایەتییەکان چەند فرۆشیارێک ڕێکلام بۆ سۆپایەک دەکەن و باس لەوە دەکەن بە ڕۆن و گاز و نەوتی پیس کار دەکات، لە وڵاتەکانی وەک ئێران و سووریا هاوردەی هەرێمی کوردستان دەکرێت، لە بازاڕە جیاوازەکانی هەولێریش بە هاووڵاتیان دەفرۆشرێن.
لەمبارەیەوە ڕێبوار خدر، پسپۆڕی ژینگە و مامۆستای زانکۆ ڕاگەیاند: "بەکارهێنانی ئەم جۆرە سۆپایەی کە بە نەوت و گاز و ڕۆنی پیس کار دەکات، کاریگەریی لەسەر پیسکردنی ژینگەی شارەکان هەیە، دەبێتە هۆی پیسبوونی هەوا، ئاو و خاک، هۆکارێکی سەرەکیین بۆ زۆربوونی نەخۆشییەکانی ژێرپەنجە و چەندان نەخۆشیی تر."
ڕێبوار خدر ئاماژەی بەوەش دا: "بەکارهێنانی ئەم جۆرە سۆپایە لە ماڵەکان کاریگەریە خراپەکانی لە پاڵاوگەیەک زیاترە، بەهۆی ئەوەی دووکەڵی پاڵاوگەیەک دەکرێت لەنێو شارەکان دوور بێت و چەند فلتەرێکی هەبێت، کاریگەریی ڕاستەوخۆی نەبێت لەسەر هاووڵاتیان، بەڵام بەکارهێنانی ئەم جۆرە سۆپایە لە ماڵەکان، بەهۆی نزیکیی لە خەڵکەوە، کاریگەریی ڕاستەوخۆی هەیە."
ڕێبوار خدر جەختیشی کردەوە: "بەکارهێنانی ئەم جۆرە سۆپایە بە واتای دانانی پاڵاوگەیەکی پچووک دێت لە ماڵەکان و کاریگەریی راستەوخۆی دەبێت لەسەر بەکارهێنەرانی و ژینگەی دەوروبەری، داوا لە هاووڵاتیان دەکات لە بەکارهێنانی ئەم جۆرە سۆپایە دوور بکەونەوە."
لە لایەکی ترەوە، نەبەز عەبدولحەمید قائیمقامی هەولێر گوتی: "ئێمە بەدواداچوونی پێویست دەکەین لەگەڵ لایەنە پەیوەندیدارەکان، بۆ زانینی چۆنیەتیی هاوردەکردن و ڕێگریکردن لە ساغکردنەوە و فرۆشتنی لە شاری هەولێر."
قائیمقامی هەولێر جەختیشی کردەوە: "هەر شتێک مەترسی لەسەر ژینگە و تەندروستیی هاووڵاتیانی شاری هەولێر دروست بکات، ڕێگەی پێنادرێت و ڕێکاری پێویستی بەرامبەر دەگیرێتە بەر."
وەڵام بدەوه