ئاگاداریەک لە وەزارەتی دارایی دەربارەی لیستی مووچە

وەزارەتی دارایی و ئابووریی حكوومەتی هەرێمی كوردستان، هەموو وەزارەت و فەرمانگەكانی لەبارەی گۆڕانکارییەک لە كاتی ناردنی لیستی مووچە ئاگادار كردەوە.
سەرچاوەیەکی وەزارەتی دارایی و ئابووریی حكوومەتی هەرێمی كوردستان ڕایگەیاند: "دوێنێ هەموو وەزارەتەکان ئاگادار کرانەوە، کە گۆڕانکارییەک لە كاتی ناردنی لیستی مووچەی مانگانە کراوە."
ئاماژەی بەوەش دا، سەرجەم وەزارەت و فەرمانگەكان ئاگادار کرانەوە، دەبێت هەفتەی داهاتوو لیستی مووچەی مانگی 12 بگەیەننە وەزارەتی دارایی، گوتیشی: "دوایین كات 5ی 12یه و ئێمەش پێش 13ی 12 ڕادەستی دارایی فیدڕاڵی دەکەین."
پێشتر پێویست بوو، فەرمانگەکان تاوەکوو 10ی مانگ لیستی مووچە ڕەوانەی دارایی بکەن.
جەختی کردەوە، ئەو ڕێکارە لەسەر داوای دارایی فیدڕاڵ و بەهۆی نزیکبوونەوەی داخستنی ژمێریاریی ساڵی 2024وەیه.
ڕۆژی 26ی 11ی 2024، وەزارەتی دارایی و ئابووری بڵاوی کردەوە، لیستی مووچەی مانگی 12ی فەرمانبەرانی هەرێمی کوردستان ڕادەستی وەزارەتی دارایی حکوومەتی فیدراڵ کرا.
سەرچاوەکەی دارایی ئەوەشی خستە ڕوو، ئامادەکردن و ناردنی لیستی مووچەی 12 بەهەمان شێوەی مانگی 11یە. گوتیشی: "کەمێک بڕی پارەکە گۆڕانکاری هەیە، ئەویش بەهۆی خانەنشین و سەرمووچه و گواستنەوەیە، كە ئەوەش مانگانە هەر ڕوو دەدات."
جەختی کردەوە، دەبێت لیستی جیاوازیی مووچەی فەرمانبەران، لەگەڵ لیستی مووچە بە سیدییەکی جیاواز و بە کاغەز بۆ دارایی بنێردرێت.
وەزارەتی دارایی زیاتر لە 25 ڕۆژە لیستی مووچەی مانگی 10ی بۆ دارایی فیدڕاڵ ناردووە، بەڵام هێشتا مووچەی مانگی 10ی خەرج نەکردووە.
پێشتر د.محەمەد زراری، بەڕێوەبەری گشتی له دیوانی چاودێریی دارایی هەرێمی کوردستان،  ڕایگەیاندبوو "مانگانە لیستی مووچەی فەرمانبەران و مووچەخۆران و هێزە ئەمنییەکان لای ئێمە وردبین دەکرێت و پاشان بۆ بەغدا دەنێردرێ