زانیاری نوێ گەیشت لەسەر زیادکردنی پشک و بودجەی هەرێمی کوردستان لە بەغدا

به‌پێی ده‌ره‌نجامی سه‌رژمێریی عێراق كه‌ ئه‌مڕۆ دووشه‌م بڵاو كرایه‌وه‌، رێژه‌ی دانیشتووانی هه‌رێمی كوردستان گه‌یشتووه‌ته‌ سه‌رووی 14%ی ژماره‌ی گشتیی دانیشتووانی عێراق و ئه‌مه‌ش هۆكاره‌ له‌ به‌رزكردنه‌وه‌ی پشكی بودجه‌ی هه‌رێمی كوردستان له‌ یاسای بودجه‌.

ژماره‌ی دانیشتووانی هه‌رێمی كوردستان كه‌ مه‌به‌ست لێی چوار پارێزگای هه‌ڵه‌بجه‌، هه‌ولێر، سلێمانی و دهۆكه‌، به‌پێی ده‌ره‌نجامی سه‌رژمێریی گشتیی دانیشتووانی عێراق كه‌ له‌ رۆژانی 20 و 21ی ئه‌م مانگه‌ به‌ڕێوه‌چوو، ئه‌مڕۆ به‌ فه‌رمی راگه‌یه‌نرا كه‌ بریتییه‌ له‌ شه‌ش ملیۆن و 370 هه‌زار و 668 كه‌س.

هاوكات ژماره‌ی گشتیی دانیشتووانی عێراق به‌ 45 ملیۆن و 407 هه‌زار و 895 راگه‌یه‌نرا. لێكدانه‌وه‌ی ژماره‌كان ده‌ری ده‌خات هه‌رێمی كوردستان 14.029%ی رێژه‌ی دانیشتووانی عێراق پێكدێنێت.

له‌ یاسای بودجه‌دا رێژه‌ی دانیشتووانی هه‌رێمی كوردستان به‌راورد به‌ عێراق 12.67%  ده‌ستنیشان كراوه‌، له‌سه‌ر ئه‌و بنه‌مایه‌ بودجه‌ و شایسته‌ داراییه‌كانی هه‌رێمی كوردستان دیاری كراوه‌. به‌و پێیه‌ رێژه‌ نوێیه‌كه‌ كه‌ رێژه‌یه‌كی راسته‌قینه‌یه‌ 1.33% له‌ هی پێشوو زیاتره‌ و پشكی هه‌رێمی كوردستان له‌ بودجه‌ ئه‌م جاره‌   له‌ سه‌رووی 14% دیاری ده‌كرێت.

جێی باسه‌ له‌ دوای رووخانی عێراق پشكی هه‌رێمی كوردستان، له‌ بودجه‌ی عێراق به‌ 17% دیاری كرابوو، به‌ڵام له‌ ده‌یه‌ی رابردوودا ئه‌و رێژه‌یه‌ له‌ به‌رچاو نه‌گیراوه‌ و حكوومه‌تی عێراق له‌ یاسای بودجه‌دا ته‌نیا 12.67%ی دیاری كردبوو ، ئه‌وه‌یش ده‌یسه‌لمێنێت به‌شێكی زۆر له‌ شایسته‌ داراییه‌كانی هه‌رێمی كوردستان له‌ لایه‌ن به‌غدا خوراوه‌