هەواڵێکی دڵخۆشکەر بۆ ئەفسەرانی هێزەکانی ناوخۆ ڕاگەیەندرا

پلەی سەدان ئەفسەری وەزارەتی ناوخۆ بەرز دەكرێتەوە

بەپێی نووسراوێكی وەزارەتی ناوخۆی حكومەتی هەرێمی كوردستان، كە لە 24/11/2024 دەرچووە، ئاماژە بە جێبەجێكردنی پلەبەرزكرنەوەی 547 ئەفسەر لە هێزەکانی ناوخۆ كراوە.

لە نووسراوەکەدا هاتووە كە ئەو ئەفسەرانە بەپێی یاسای راژە و خانەنشینیی هێزەكانی ئاسایشی ناوخۆی فیدراڵی، كە لە هەرێمی كوردسان بەركارە، پلەی شایستەی خۆیان پێدەرێت و مووچە و شایستەكانیشیان بەرز دەبێتەوە و فەرمانەكە لە 14/7/2024ەوە جێبەجێ دەكرێت.

لای خۆیەوە هێمن میرانی، بەڕێوەبەری گشتیی دیوانی وەزارەتی ناوخۆی حکومەتی ھەرێمی کوردستان رایگەیاند: ئەو پلەبەرزكرنەوەیە تایبەتە بە ئەفسەرانی هێزەكانی ناوخۆ بۆ خشتەی تەمووزی 2024، هەركەس نۆرەی هاتبێت و لە تاقیكردنەوە و مەرجەكان دەرچووبێت، ئەوە ناوی لە لیستی پلەبەرزكرنەوەكەدا هەیە، دەشڵێت رێنوێنی و رێكارەكانی پلەبەرزكردنەوەی ئەفسەران وەكوو خۆیەتی و گۆڕانكاریی تێدا نەكراوە.