لە دوێنێوە لە ماوەی 24 سەعاتدا لە كەركووك پێنج هەزار عەرەب وەك چاودێر دامەزرێنراون، ئەگەرچی پارێزگاری كەركووك گوتی، ئەو كارەمان راگرتووە، بەڵام بەڕێوەبەرایەتیی سەرژمێری كەركووك بە ئاگاداری وەزارەتی پلاندانان كارەكەی ئەنجام داوە.
لە دوێنێوە بەڕێوەبەرایەتیی سەرژمێریی كەركووك زیاتر لە پێنج هەزار فەرمانبەری عەرەبی وەك چاودێر بەسەر پرۆسەكەوە تۆمار كردووە و هیچ كوردێكی لەو پرۆسەیەدا بەشداری پێ نەكردووە، ئەمەش وایكرد كورد لە كەركووك گومانەكەیان لە سەرژمێری زیاتر بێت.
سەرچاوەیەك لەناو بەڕێوەبەرایەتیی سەرژمێریی كەركووك بە "کوردستان پرێس"ی راگەیاند، ئەوەی كراوە پلانێكە لەگەڵ وەزارەتی پلاندانانی عێراق ئیشی بۆ كراوە، ئامانجەكەش ئەوەیە كورد لە كەركووك ناونووس نەكرێت.
ئەوەی هێزە كوردییەكان لەم چەند رۆژەدا داوایان لەو كەركووكییانە كردووە بگەڕێنەوە شارەكانیان و لەسەر ماڵێكی خزمیان خۆیان ناونووس بكەن، بەپێی سەرچاوەكەی "کوردستان پرێس" زۆرینەی ئەو ماڵانە لەلایەن تیمەكان و ئەو چاودێرە عەرەبانەی دەچنە ناوچە كوردییەكانەوە تۆمار ناكرێن.
ئەو فەرمانبەر و چاودێرە عەرەبانەی دەچنە ماڵە كوردییەكان دەپرسن، ئەو خانووە چەند ماڵی تێدایە؟ خاوەن ماڵ دەڵێت: سێ ماڵە، ئەوانیش دەڵێن، نابێت خانوو یەك ماڵە و دەبێت یەك ماڵی تێدا بێت.
ئەگەرچی حكوومەتی عێراقی فیدراڵ بڕیاری دا لەسەر بنەمای سەرژمێریی ساڵی 1957 لە كەركووك سەرژمێری بكرێت، بەڵام بەڕێوەبەرایەتییەكانی ئەو شارە ئەو بڕیارە جێبەجێ ناكەن.
محەمەد عەلی تەمیم وەزیری پلاندانانی عێراق كە یەكێكە لە سەركردەكانی سوننە، گومان دەكرێت هیچ یەك لەو بەڵێنانەی حكوومەت بە كوردی دا جێبەجێ نەكات، سەرژمێری لە دژی كورد لە ناوچە دابڕێنراوەكان بەكار بێنێت.
هاوكات بەپێی زانیارییەكان، هەموو ئەو عەرەبانەی لە دوای 16ی ئۆكتۆبەرەوە چوونەتە ناوچە كوردییەكان، بە خەڵكی ئەو ناوچانە تۆمار دەكرێن و ئەمەش پلانێكی وەزیرە سوننەكەی ناو ئەنجوومەنی وەزیرانی عێراقی فیدراڵە.
وەڵام بدەوه