هاوڵاتیان ئاگاداردەکرێنەوە

ئەو هاووڵاتییانەی خەریكی مامەڵەی پاسپۆرتن و لەدەرەوەی وڵاتن، لەبارەی كارنەكردن بە تۆماری ئەلیكترۆنی ئاگادار دەكرێنەوە.

بەڕێوەبەرایەتیی پاسپۆرتی پارێزگای ھەولێر، بڵاوی كردەوە: "ئەو هاووڵاتییانە ئاگادار دەکەینەوە، کە لەدەرەوەی وڵات نیشتەجێن و بۆ دەرهێنان و نوێکردنەوەی پاسپۆرت دەگەڕێنەوە، پێویستە کارتی نیشتمانییان هەبێت."

جەخت كراوەتەوە: "بەپێی بڕیاری وەزارەتی ناوخۆی حکوومەتی فیدراڵ، بۆ دەرهێنان و نوێکردنەوەی پاسپۆرت، کار بە وێنەی تۆمار (سورەت قەید) ناکرێت."

لەسەرێكی دیكەوە، لە راگەیاندراوێكی پاسپۆرتی سلێمانی ئاماژە بەوە كراوە: "سەرجەم هاووڵاتییانی تاراوگە ئاگادار دەکەینەوە، کە لەدەرەوەی عێراق و هەرێمی کوردستان نیشتەجێن، بۆ دەرهێنان و نوێکردنەوەی پاسپۆرت، بە هیچ جۆرێک کار بە (سووڕەت قەیدی ئەلیکترۆنی) ناکرێت."

ئەوەش خراوەتە ڕوو: "بە بڕیاری وەزارەتی ناوخۆی حکوومەتی فیدڕاڵ، کارکردن بە (سووڕەت قەیدی ئەلیكترونی) ڕاگیراوە."

باسی ئەوەش كراوە، كە هاووڵاتییان تەنیا بە کارتی نیشتمانی دەتوانن مامەڵەکانیان رایی بکەن، تیاشیدا هاتووە: "پێویستە لە کاتی گەڕانەوەیان بۆ هەرێمی کوردستان،. مۆڵەتی 30 ڕۆژ وەربگرن، چونكە تەواوبوونی کارتی نیشتمانی ماوەکەی 20 بۆ 30 ڕۆژی پێ دەچێت."