ئەندامێكی لێژنەی دارایی پەرلەمانی عێراق، بۆ ناردنی مووچەی مووچەخۆرانی هەرێمی كوردسنان دڵنیایی دەدات و دەڵێت: "تەرخانكراوی دارایی هەیە و مووچەی مانگەكانی 10 و 11 و 12 دەنێردرێت."
نەرمین مەعروف، ئەندامی لێژنەی دارایی پەرلەمانی عێراق، تایبەت رایگەیاند: "مووچەی مانگەكان 10 و 11 و 12ی ئەمساڵ بێ كێشە دەنێردرێت، چونكە تەرخانكراوی دارایی هەیە و تاوەكوو كۆتایی ئەمساڵ ئەم سێ مووچەیە دەدرێت."
لەبارەی مووچە و بودجە بۆ ساڵی داهاتوو ،ئەو پەرلەمانتارە گوتی: "ئێمە بودجەی سێ ساڵمان پەسند كردووە، بۆیە حكوومەتی عێراق خشتەی بودجەی 2025 بۆ پەرلەمان دەنێرێت، لە بودجەی 2025دا پشكی مووچەخۆران و فەرمانبەرانی هەرێمی كوردستان جێگیر كراوە و كێشەی نابێت و بەردەوام دەبێت."
سەبارەت بە ناردنی پشكەكانی دیكەی بودجەی هەرێمی كوردستان گوتی: "مووچە كێشەی نابێت، بەڵام پرسی ناردنی شایستەكانی دیكەی بەشە بودجە ئەوەیان بابەتێكی دیكەیە و پەیوەستە بە پابەندیی هەردوو حكوومەت، بۆ ئەوەش ئێمە بەردەام بەدواداچوون دەكەین."
بڕیارە لەم یەك دوو رۆژەدا وەزارەتی دارایی هەرێمی كوردستان لیستی مووچەی مانگی 10ی هەرێمی كوردستان بۆ دارایی فیدراڵ بنێرێت و ئەوانیش پارەی پێویست بۆ مووچەی مانگی 10 رەوانە بكەن.
لای خۆیەوە، شێروان دووبەردانی، ئەندامی فراكسیۆنی پارتی دیموكراتی كوردستان لە پەرلەمانی عێراق، راگەیاند: "دوای سەردانی شاندی ئەنجوومەنی باڵای ئابووریی عێراق بۆ هەولێر و ڕێککەوتن لەگەڵ حکوومەتی هەرێمی کوردستان، مووچەی ئەو سێ مانگەی ئەمساڵیش بێ كیشە دەنێردرێت."
لە رۆژی 4ی10ی2024دا مەسعود حەیدەر، بریكاری وەزارەتی دارایی عێراق، رایگەیاند: "وەزارەتی دارایی عێراق بەردەوام دەبێت لە خەرجکردنی ئەو مووچانەی، کە خەرج نەکراون و خەرجکردنی مووچەی فەرمانبەرانی ھەرێمی کوردستان وەکوو ھەموو فەرمانبەرانی دیكەی عێراق دەدرێت، ھەتا کۆتایی ساڵی 2024 ھەردوو حكوومهتی فیدراڵی و ھەرێمی کوردستان چارەسەری ھەر تێبینییەك دەکەن، كە ھەبێ."
وەڵام بدەوه