لەسەر كۆتاییهاتنی پڕۆسەی هەڵبژاردن بە سەركەوتوویی، سكرتێری گشتیی نەتەوەیەكگرتووەكان پەیامێكی پیرۆزبایی ئاڕاستەی خەڵكی كوردستان كرد و داواش لە لایەنە سیاسییەكان دەكات، كە لە ڕێی كەناڵە یاساییەكانەوە ناكۆكییەكانی هەڵبژاردن چارەسەر بكەن و حكوومەتێكی گشتگیر پێكبهێنن.
ئەمڕۆ سێشەممە 22ی 10ی 2024، سكرتێری گشتیی نەتەوەیەكگرتووەكان پەیامێكی پیرۆزبایی بڵاو كردەوە و ڕایگەیاند: "سکرتێری گشتیی نەتەوەیەکگرتووەکان پیرۆزبایی لە هەرێمی کوردستان و گەلەکەی دەکات بەبۆنەی ئەنجامدانی هەڵبژاردنی پەرلەمانی لە 20ی ئۆکتۆبەر، کە بە شێوەیەکی ئارام و ئاشتییانە بەڕێوەچوو."
ئەوەش هاتووە، كە "سکرتێری گشتی ستایشی هەوڵەکانی کۆمیسیۆنی باڵای سەربەخۆی هەڵبژاردنەکان دەکات، کە لەلایەن نێردەی نەتەوەیەکگرتووەکان بۆ هاوکاری عێراق (یونامی) پاڵپشتی دەکرێت، لە ئامادەکارییەکان و بەڕێوەچوونی ئەم هەڵبژاردنانەدا."
ئاماژە بەوەش دراوە، كە "لە کاتێکدا هەرێمی کوردستان چاوەڕێی ئەنجامە کۆتاییەکانە، سکرتێری گشتی هانی سەرجەم سەرکردە سیاسییەکان و توێژەرانی کۆمەڵگا دەدات، کە بەردەوام بن لە پاراستنی کەشێکی ئارام و داوا لە لایەنە سیاسییەکان دەکات هەر ناکۆکییەکی هەڵبژاردن لە ڕێگەی کەناڵە یاساییەکانەوە چارەسەر بکەن و بە پێکهێنانی حکوومەتێکی گشتگیر بە زووترین کات و پڕۆسەی هەڵبژاردن تەواو بکەن."
باسی لەوەش كردووە: "سکرتێری گشتی پابەندبوونی نەتەوە یەکگرتووەکان دووپات دەکاتەوە بۆ پشتیوانییکردن لە هەوڵەکانی عێراق بۆ پتەوکردنی دەستکەوتە دیموکراسییەکان و بنیاتنانی ئایندەیەکی خۆشگوزەران بۆ گەلی عێراق."
وەڵام بدەوه