بریکاری وەزارەتی بازرگانی و پیشەسازیی حكوومەتی هەرێمی كوردستان رای دەگەیهنێت، 45 ملیار دیناری پارەی گەنمی جووتیاران لە بەغداوە گەیشت و دەست بە دابەشکردنی دەکرێت.
سەروەر کەمال هاواری، بریکاری وەزارەتی بازرگانی و پیشەسازیی حکوومەتی هەرێمی کوردستان، راگەیاند: "دوێنێ کۆمپانیای بازرگانیی دانەوێڵەی عێراق، بۆ بەشی حەوتەمی پارەی گەنمی جووتیاران، نزیکەی 45 ملیار دیناری ناردووە."
ئاماژەی بەوەش دا، چەکەکان دەنێردرێن و دوای پەسندکردنیان دابەش دەکرێن، گوتیشی: "چەکەکان بۆ پارێزگاکان دەنێردرێن و دوای ڕێکارە ئیداری و داراییەکان، پارەکە لە بانک خەرج دەکرێت."
سەروەر کەمال ئەوەشی خستە ڕوو، لەو 45 ملیار دینارە، 20 ملیاری بۆ سلێمانییە و 15 ملیار بۆ هەولێرە و 10 ملیار دیناریش بۆ دهۆک.
بریکاری وەزارەتی بازرگانی ئەوەشی گوت: "بەرپرسی لقی دانەوێڵەکانی ئێمه لە پارێزگاکان چەکەکان وەردەگرێ و دواتر لە بانک ڕەسید دەکا و بەسەر سایلۆکاندا دابەشی دەکات."
لە 9ی9ی 2024، بەشی شەشەمی پارەی گەنمی جووتیاران، کە بڕەکەی 150 ملیار دینار بوو نێردرا و پارەکە دابەش کرا.
لە پارەی شایستەی گەنمی ئەمساڵی جووتیارانی هەرێمی کوردستان، دوای ناردنی ئەو 45 ملیار دینارە، هێشتا 288 ملیار دینار ماوە بنێردرێ.
وەڵام بدەوه