بڕیاری لێخۆشبوون بۆ قەرزێک درا

حکوومەتی هەرێمی کوردستتان رەزامەندیی بۆ درێژكردنەوەی ماوەی لێخۆشبوون لە قەرزارانی باج دا و بەرپرسێكی باجیش روونكردنەوە لەبارەی بڕیارەكەوە دەدات.

بەپێی نووسراوێكی ئەنجوومەنی وەزیران و كە 26ی9ی2024، دەرچووە  جەخت لەسەر ئەوە كراوەتەوە، كە لە چوارچێوەی ئاسانکارییەکانی حکوومەت بۆ باجدەران و بەرەچاوکردنی دۆخی ناهەمواری دارایی بڕیارێک دراوە و هاتووە "رەزامەندی درا لەسەر بەردەوامبوونی لێخۆشبوون لە تەواوی  سوو و  سزای دواکەوتنی پێدانی باج و کرێی ساڵانەی موڵکەکانی میری."

ئاماژە بەوەش دراوە، كە: "ئەم درێژكردنەوەیە تاوەكوو 3ی10ی2024 بەردەوام دەبێت."

لە کۆبوونەوەی رۆژی 27ی ئاداری 2024ی ئەنجوومەنی وەزیرانی هەرێمی كوردستان، كۆمەڵێك بڕیار بۆ بەرژەوەندیی هاووڵاتیان دران، لەوانە لێخۆشبوون لە قەرزە کەڵەکەبووەکان لە باج و سزای پێبژاردنی هاتوچۆ و ئاو و کارەبا

د. کەمال وەرتی، بەڕێوەبەری گشتیی باجی هەرێمی کوردستان راگەیاند: "بڕیارەکە هەموو باجدەران دەگرێتەوە، ئەوەی باجی ڕاستەقینە بدات ئەوە لێخۆشبوون لە هەموو غەرامەکانی دەکرێت."ئەوەشی خستە ڕوو: "ئەو بڕیارە وەكوو ئاسانكاری و هاوكارییە یۆ هاووڵاتیان و باجدەران و كۆمپانیاكان."