جۆوی هوود، یاریدەدەری کاربەڕێکەری وەزیری دەرەوەی ئەمەریکا بە کوردستان24 راگەیاند، هەستێکی ناخۆشی هەیە کە نەورۆز لە کوردستان نابێت و دەشڵێت، پەیوەندی باشمان لەگەڵ سەرۆکی حکومەتی هەرێمی کوردستان و سەرۆکی هەرێمی کوردستان و سەرۆک وەزیرانی عێراق هەیە.
جۆوی هوود تایبەت بە کوردستان24ـی راگەیاند، من دڵخۆش نیم چونکە دوو ساڵ لەمەوبەر لەگەڵ ئێوە ئاهەنگی نەورۆزم دەگێڕا، ئێستا بەهۆی کۆرۆنا، ناتوانم بێم و چانسی بەسەر بردنی کات لەو کەشەوهەوا خۆشە لەگەڵ هاوڕێیانم لە هەرێمی کوردستان لەدەستداوە.
یاریدەدەری وەزیری دەرەوەی ئەمەریکا دەڵێت: ''هیوادارم ساڵی داهاتوو، بێمەوە هەولێر، سلێمانی و دهۆک و ناوچەکانی دیکە. لەگەڵ ئەوەش، پیرۆزبایی نەورۆزتان لێدەکەم و هیوادارم ساڵی داهاتوو هەموو شتێک باشتر ببێت''.
لەبارەی ئیدارەی نوێی ئەمەریکا گووتی: ''ئیدارەی ئێستامان لە کەسانی شارەزا پێکهاتووە کە ئەزموونی لەگەڵ عێراق، بە تایبەت کوردستان هەیە. ئەوان بەرپرسی دیارن و خەڵکی دەیاناسێت''.
ئاماژەی بەوەشکرد، ئێمە دڵخۆشین کە پەیوەندییەکی باشمان لەگەڵ بەرپرسانی هەرێم و بەغدا هەیە. ئێمە بە دوای هەلی نوێی بازرگانی و ئاڵووگۆڕی زیاتر دەگەڕێین لەگەڵ هەرێمی کوردستان، هەروەها لە رێگای پرۆگرامی پێکوتە، دەمانەوێت هاوکاری هەرێم بکەین بۆ دابەشکردنی پێکووتەی کۆرۆنا.
ئەو بەرپرسەی وەزارەتی دەرەوەی ئەمەریکا لەبارەی داهاتوو هەرێم و ئەمەریکا گووتی: ''پێکەوە دەتوانین کاری زیاتر بکەین لە تەواوی کایە جیاوازەکان بەڵام پێویستمان بە سەقامگیریی زیاترە، هێزەکانی و عێراق و پێشمەرگە قارەمانەکان کارێکی گەورەیان بۆ پاراستنی عێراق کردووە و مەترسی داعشیان کەمکردووەتەوە. ئێمە پەیوەندییەکی زۆر باشمان لەگەڵ مستەفا کازمی، مەسرور بارزانی و نێچیرڤان بارزانی هەیە و دەتوانین هەوڵێکی باش بدەین کە بەغدا و هەولێر بە زووترین کات بگەنە رێککەوتن.
وەڵام بدەوه